Rais Samia Suluhu Hassan ameteua na kufanya mabadiliko ya uteuzi kwa wakuu wa wilaya, Wakurugenzi wa Halmashauri, Makatibu Tawala na Kaimu Kamishna Shirika la Hifadhi za Taifa Tanzania (TANAPA).

Kwa Wakuu wa wilaya amemhamisha kituo cha kazi Sixtus Mapunda kutoka wilaya ya Sumbawanga mkoani Rukwa kuwa mkuu wa wilaya ya Temeke mkoani Dar es Salaam.

Mapunda anachukua nafasi ya Mobhare Matinyi ambaye ameteuliwa kuwa Mkurugenzi wa Idara ya Habari – Maelezo na Msemaji Mkuu wa Serikali.

Amemhamisha kituo cha kazi mkuu wa wilaya ya Urambo mkoani Tabora Kenan Kihongosi kwenda kuwa mkuu wa wilaya ya Momba mkoani Songwe.

Kihongosi anachukua nafasi ya Fakii Raphael Lulandala ambaye ameteuliwa kuwa Katibu Mkuu wa Umoja wa Vijana wa Chama Cha Mapinduzi (UVCCM).

Elibariki Bajuta, Kamishna Msaidizi Mwandamizi wa Uhifadhi, Mamlaka ya Hifadhi ya eneo la Ngorongoro ameteuliwa kuwa mkuu wa wilaya ya Urambo mkoani Tabora kuchukua nafasi ya Kenan Kihongosi aliyehamishiwa Momba.

Rais Samia pia amemteua William Mwakilema, Kamishna wa Uhifadhi wa Shirika la Hifadhi za Taifa Tanzania (TANAPA) kuwa mkuu wa wilaya ya Korogwe Mkoani Tanga kuchukua nafasi ya Jokate Mwegelo ambaye ameteuliwa kuwa Katibu Mkuu wa Umoja wa Wanawake Tanzania (UWT).

Nyakia Ally Chirukile ameteuliwa kuwa mkuu wa wilaya ya Sumbawanga ambapo anachukua nafasi ya Sixtus Mapunda aliyehamishiwa Temeke.

Kabla ya uteuzi huo Nyakia alikuwa Katibu Tawala wa Ngorongoro.

Mbunge wa Busanda mkoani Geita Mhandisi Tumaini Magesa, ameiomba Serikali kujenga miundombinu ya barabara na umeme kwenye maeneo yenye shughuli za uchimbaji wa madini mkoani humo ili kurahisisha shughuli za uchimbaji madini na kuokoa gharama mbadala.

Magesa ameyasema hayo wakati wa ufungaji wa maonesho ya Sita ya Kimataifa ya Teknolojia ya Madini mkoani Geita na kuyataja maeneo yenye changamoto ya barabara na umeme ambayo ni barabara ya kutoka Buliyankuru – Kahama na Katoro – Magenge – Ushirimbo.

Ameongeza kuwa, kuwepo kwa changamoto hiyo ya barabara na umeme kunapelekea kutumia gharama nyingi katika kuendesha migodi hiyo na kusababisha wachimbaji wadogo kutokuwa na mazingira mazuri kushiriki kwenye shughuli za uchimbaji

Mbunge wa Geita Vijijini Joseph Kasheku (Msukuma) amesema Geita hawana matatizo yoyote na Rais Samia Suluhu Hassan kwasababu yote waliyoyaomba yamefanyiwa kazi na yanaendelea kufanyiwa kazi jimboni kwake.

Msukuma ameyasema hayo wakati wa ufungaji wa maonesho ya Sita ya Kimataifa ya Teknolojia ya Madini mkoani Geita.

Amesema katika jimbo lake la Geita Vijijini, barabara zimejengwa mpaka mtaani, umeme upo na pia kuna taa zimefungwa katika barabara za jimbo hilo.

Aidha, Msukuma ameomba maonesho hayo ya madini yaendelee kufanyika Geita na kutopelekwa sehemu nyingine kama ilivyo kwa maonesho mengine kama Sabasaba na Nanenane ambayo huzunguka mikoa mbalimbali. Msukuma amesema asili ya Dhahabu ni Geita na mkoa huo unaongoza kwa uchimbaji wa madini hivyo haina haja kuyapeleka maonesho hayo sehemu nyingine

Mbunge wa Msalala Iddi Kassim Iddi, amesema changamoto ya kutofanyiwa kazi kwa miradi mbalimbali ya wawekezaji Serikalini kwa asilimia kubwa inasababishwa na baadhi ya watendaji serikalini na matatizo wanayo wao na sio wawekezaji.

Iddi ambaye pia amemwakilisha Mwenyekiti wa Kamati ya Bunge, Nishati na Madini, ameyasema hayo wakati wa ufungaji wa maonesho ya Sita ya Kimataifa ya Teknolojia ya Madini mkoani Geita.

Ameongeza kuwa, hata baadhi ya changamoto ya barabara mkoani Geita tayari wawekezaji wameshatoa fedha kwa ajili ya ujenzi wa barabara hizo lakini baadhi wa watendaji serikalini ndio wanaokwamisha ujenzi huo.

Ameiomba Serikali kutunga sera ya msamaha wa kodi kwa wachimbaji wadogo na pia kuondoa ukomo kwa makampuni yanayofanya utafiti wa madini ili kuyapa muda wa kufanya utafiti huo zaidi.