Benki ya Standard Chartered Group imekubali kuipatia Tanzania mkopo nafuu wa dola Bilioni 1.46 za Kimarekani ambazo ni sawa na zaidi ya Shilingi Trilioni 3.3 kwa ajili ya kujenga kipande cha reli ya kiwango cha kimataifa (SGR) kuanzia Morogoro hadi Makutupora mkoani Dodoma.

Hayo yamebainishwa jijini Dar es salaam na Waziri wa Fedha na Mipango Dkt Philip Mpango baada ya kukutana na kufanya mazungumzo na mkurugenzi mtendaji wa Benki hiyo Bill Winters.

Dkt Mpango ameishukuru benki hiyo kwa kukubali kugharamia ujenzi wa reli hiyo ya kisasa ambayo lengo lake ni kuimarisha usafiri na usafirishaji wa abiria na mizigo kwenda bara na nchi jirani za Maziwa Makuu na zile ambazo hazipakani na Bahari.

“Tunajenga reli hiyo ya Kisasa kutoka Dar es salaam – Morogoro hadi Makutupora ambazo ni awamu mbili lakini pia tutajenga reli hiyo kuelekea Isaka mpaka Mwanza na baadaye Rusumo ambapo wenzetu wa nchi ya Rwanda, tutasaidiana, wao watajenga reli hiyo kutoka Rusumo hadi Kigali” ameongeza Dkt Mpango

Waziri huyo wa Fedha na Mipango amemueleza mkurugenzi mtendaji huyo wa Benki ya Standard Chartered Group Bill Winters anayeongoza benki hiyo kwenye nchi zaidi ya Sitini duniani kuhusu vipaumbele vikubwa vya Tanzania ambavyo ni pamoja na kuboresha Kampuni ya Ndege Nchini (ATCL) na Ujenzi wa mradi mkubwa wa kufua umeme wa Mto Rufiji.

Kwa upande wake Winters ameipongeza Tanzania kwa kupiga hatua kubwa kiuchumi na kwamba Benki ya Standard Chartered Group itatoa mkopo nafuu wa dola Bilioni 1.46 za Kimarekani kwa Tanzania na kuahidi kuwa balozi wa kuelezea mafanikio makubwa ya kiuchumi ya Tanzania kwa wadau wengine.

Pia ameahidi kuzishawishi taasisi nyingine za fedha ulimwenguni kuangalia uwezekano wa kuunga mkono jitihada hizo ambazo mwisho wake wanufaika wakubwa watakuwa ni wananchi wote wa Tanzania kwa ujumla.

Serikali imekamilisha ujenzi wa barabara ya juu katika makutano ya barabara ya Mandela na Nyerere eneo la Tazara jijini Dar es salaam kwa asilimia 98.

Akizungumza na waandishi wa habari wakati wa ukaguzi wa mwisho wa baraara hiyo, Waziri Mkuu Kassim Majaliwa amesema kuwa kazi ya ujenzi wa barabara hiyo ya juu imefikia mahali pazuri na serikali inaendelea kuimarisha na kukamilisha miradi mikubwa nchini kama sehemu ya kutekeleza ahadi za serikali kwa Watanzania.

Amesema kuwa katika ujenzi huo ni vitu vidogo tu ambavyo bado havijakamilika ili kuwezesha watanzania kuanza kufaidi matunda ya serikali yao, jambo ambalo ni la kujivunia.

Ujenzi wa barabara hiyo unaofadhiliwa na serikali ya Japan umefikia asilimia 98, ambapo barabara na njia zote zimekamilika, taa pamoja na miundombinu mingine iko tayari na kilichobaki ni ujenzi wa kiwango cha juu pembeni mwa barabara hizo ili kuzuia udongo na mchanga kuingia katika barabara.

Kwa mujibu wa Waziri Mkuu Majaliwa, ujenzi huo wa barabara ya juu katika makutano ya barabara ya Mandela na Nyerere eneo la Tazara utarahisisha maisha ya wakazi wa Dar es salaam hasa wanaotoka maeneo ya Gongo la Mboto, Mbagala na Pugu kwenda katikati ya jiji kwa kuepusha adha ya foleni eneo la Tazara, pia abiria kutoka uwanja wa ndege kwenda katikati ya jiji watarahisishiwa usafiri kutokana na kupungua kwa foleni.

Waziri Mkuu pia ametembelea eneo la Ubungo ambako alikagua ujenzi wa mradi mkubwa wa barabara kuu ya Dar es salaam- Morogoro.

Akieleza mpango wa serikali wa kukamilisha ahadi zake kwa wananchi Waziri Mkuu Majaliwa amesema kuwa serikali imejipanga kuwa mpaka kufikia Juni 2020 mradi wa Ubungo utakuwa umekamilika.

Amemuagiza mkuu wa mkoa wa Dar es Salaam, -Paul Makonda kutenga eneo maalum kwa ajili ya wafanyabiashara wadogo maarufu kama wamachinga walioko Ubungo ambako ujenzi unaendelea ili wasiathiri utekelezaji wa mradi huo.

Waziri wa Elimu, Sayansi na Teknolojia Profesa Joyce Ndalichako ameiagiza bodi mpya ya Baraza la Mitihani la Taifa (NECTA) kusimamia utungaji na uendeshaji wa mitihani kwa kuzingatia sheria na taratibu zilizowekwa katika kuboresha kiwango cha elimu nchini.

Waziri Ndalichako ametoa agizo hilo jijini Dar es salaam wakati wa kuzindua bodi hiyo mpya ya Baraza la Mitihani la Taifa na kuongeza kuwa uteuzi wa bodi hiyo mpya utaleta tija katika usimamizi na udhibiti ubora wa elimu nchini.

Katika kuboresha udhibiti wa udanganyifu wa mitihani nchini, Waziri Ndalichako amesema kuwa serikali imenunua mashine itakayofunga mitihani yenyewe huku akiwaonya walimu watakaojihusisha na wizi wa mitihani kuwa serikali haitawavumilia.

Bodi hiyo mpya ya Baraza la Mitihani la Taifa iliyozinduliwa na Waziri wa Elimu, Sayansi na Teknolojia Profesa Joyce Ndalichako inajumuisha wajumbe Tisa ambao watafanya kazi kwa miaka mine.

Serikali imesema kuwa kuanzia Septemba Tano mwaka huu visimbuzi vitaanza kuonesha chaneli zote za ndani bila kutoza gharama yoyote kwa mtazamaji.

Akizungumza na waandishi wa habari jijini Dar es salaam kuhusu yaliyojadiliwa katika kikao kati ya Waziri wa Habari, Utamaduni, Sanaa na Michezo Dkt Harrison Mwakyembe na wadau na wamiliki wa televisheni nchini, Mkurugenzi wa Idara ya Habari-Maelezo na Msemaji Mkuu wa Serikali Dkt Hassan Abbasi amesema kuwa serikali imefikia uamuzi huo baada ya visimbuzi vya Azam, Zuku na DSTV kutoonesha chaneli za ndani kulingana na aina ya leseni zao.

Dkt Abbasi amesisitiza kuwa kuanzia Septemba Tano mwaka huu visimbuzi vya TIN, Starmedia, Continental na Digtek vitaonesha takribani chaneli 34 za ndani bure ili kutoa fursa ya kila mwananchi kuwa na haki ya kupata taarifa.

Amesema kuwa wadau hao na wamiliki wa televisheni wameonesha kuridhishwa na hatua hiyo ya kwa vile serikali imetengeneza miundombinu itanayoruhusu chaneli zao kuonekana nchi nzima.

Kikao hicho kati ya Waziri Mwakyembe na wadau na wamiliki wa televisheni nchini kimefanyika kwa lengo la kuwa na majadiliano ya pamoja baina serikali na wadau hao ili kupata muafaka kuhusu kutooneshwa kwa chaneli za ndani katika visimbuzi vilivyokiuka masharti ya leseni zao.

Waziri Mkuu Kassim Majaliwa amesema ukosefu wa uadilifu ni moja ya eneo ambalo lilitia doa utendaji wa sekta binafsi hususan pale ambapo ilishirikiana na serikali.

Waziri Mkuu ameyasema hayo jijini Dar Es Salaam wakati akifungua mkutano mkuu wa 18 wa mwaka wa Taasisi ya Sekta Binafsi Tanzania –TPSF, kwa niaba ya Rais Dkt. John Magufuli.

Akizungumza na wafanyabiashara hao, Waziri Mkuu amesema uadilifu ni changamoto inayopaswa kufanyiwa kazi na serikali na TPSF.

Pia Waziri Mkuu ameitaka TPSF ijifunze kwa walioendelea kwa kutokuwa na vitendo vya rushwa na kutoa adhabu kwa wanaoenda kinyume na misingi ya uadilifu waliojiwekea.

Waziri Mkuu Majaliwa amesema serikali kwa upande wake itaendelea kuweka mazingira wezeshi kwa kuboresha miundombinu, kutoa vivutio kwenye kodi, kanuni na sheria ili kukuza sekta binafsi.

Amewasihi TPSF kuwekeza zaidi kwenye uzalishaji wa bidhaa za viwandani na wahakikishe kuwa wanajali maisha ya Watanzania ambao ndio soko na wateja wa bidhaa zao.