Mahakama nchini Myanmar imewahukumu waandishi wa habari wawili wa shirika la habari la Reuters kifungo cha miaka Saba jela kila mmoja kwa kosa la kufanya uchunguzi wa siri nchini humo kuhusu mgogoro wa Rohingya.

Waandishi hao ambao ni Wa Lone na Kyaw Soe Oo walishitakiwa kwa kosa la kuwa na nyaraka za serikali ambazo walidai kupatiwa na askari polisi, jambo ambalo wamedai lilikuwa limepangwa.

Kesi hiyo imeonekana kwa wengi kuwa ni ukandamizaji wa uhuru wa habari nchini Myanmar.

Waandishi hao walikuwa wanatafuta ushahidi juu ya mauaji wa wanaume Kumi yaliyofanywa na jeshi la nchi hiyo katika kijiji cha Inn Din In mwezi September mwaka 2017.

Rais Xi Jinping wa China amefungua mkutano wa siku mbili wa Wakuu wa nchi na serikali wa Jukwaa la Ushirikiano kati ya China na Afrika (FOCAC).

Akifungua mkutano huo Rais Xi Jinping amesema kuwa China itatoa Dola Bilioni 60 za Kimarekani kwenye mpango wake wa miaka mitatu ya ushirikiano na Afrika katika shughuli za maendeleo.

Rais Xi Jinping ameahidi kuwa China itatoa ushirikiano ili kuhakikisha kwamba amani ya kudumu inapatikana Barani Afrika, hatua ambayo ni muhimu kwa ustawi wa nchi za Afrika.

Maeneo mengine ambayo Rais huyo wa China ameahidi kuwa nchi yake italisaidia Bara la Afrika ni ujenzi wa miundombinu, ushirikiano katika sekta ya biashara na huduma za afya.

Kadhalika Rais Xi Jinping amesema kuwa China itatoa nafasi za mafunzo ya kilimo bora na mafunzo ya ufundi kwa watalaam kutoka nchi za Afrika ili kuchangia katika

Waziri Mkuu Kassim Majaliwa ambaye anamuwakilisha Rais John Magufuli katika mkutano huo alipata nafasi ya kusalimiana na Rais Xi Jinping baada ya ufunguzi wa mkutano huo.

Kumetokea shambulio la kujitoa muhanga katika ofisi moja ya serikali kwenye mji mkuu wa Somalia, – Mogadishu na kusababisha shule iliyokuwa karibu na ofisi hiyo kuporomoka.

Mtu aliyekua kwenye gari amejilipua katika eneo la ofisi hiyo na kusababisha askari watatu kuuawa na watu wengine 14 kujeruhiwa wakiwemo watoto Sita.

Askari hao waliouawa walikua wakijaribu kulizuia gari hilo lililokuwa limejaa milipuko kuingia kwenye ofisi hiyo ya serikali.

Shambulio hilo pia limeharibu nyumba zilizo karibu na ofisi hiyo na kung’oa paa la msikiti mmoja.

Wanamgambo wa Al-Shabab ambaao wamekuwa wakifanya mashambulio mbalimbali kwa zaidi ya miaka 10 nchini Somalia wamedai kuhusika na tukio hilo.

Marekani imetangaza kufuta msaada wa Dola Milioni 300 za Kimarekani kwa Pakistan kwa madai kuwa nchi hiyo imeshindwa kuyachukulia hatua makundi ya wanamgambo.

Taarifa iliyotolewa na Jeshi la Marekani imesema kuwa nchi hiyo itatumia fedha hizo kwa masuala mengine ya dharura.

Marekani imesema kuwa Pakistan imekuwa ikipuuza ama kushindwa kukabiliana na wanamgambo wanaoendesha shughuli zao kwenye ardhi ya nchi hiyo wakiwemo wanamgambo wa Haqqani na wale wa Talibabn.

Mwezi Januari mwaka huu Marekani ilisema kuwa itafuta karibu misaada yote ya shughuli za ulinzi kwa nchi hiyo ya Pakistan.