Rais John Magufuli ameweka jiwe la msingi la mradi wa maji wa Lamadi na kufungua barabara za mji wa Lamadi katika wilaya ya Busega mkoani Simiyu ikiwa ni sehemu ya ziara yake mkoani humo.

Akiwa katika mkoa huo wa Simiyu, Rais Magufuli pia amefungua jengo la wagonjwa wa nje la hospitali ya rufaa ya mkoa huo na ameweka jiwe la msingi la ujenzi wa kiwango cha lami barabara ya Maswa – Bariadi.

Mradi wa maji wa Lamadi utakaozalisha lita milioni 3.3 za maji kwa siku ambayo ni mara mbili ya mahitaji ya lita milioni 1.8 ya wakazi wa mji huo kwa sasa, utatatua kero ya miaka mingi ya uhaba wa maji kwa wakazi hao ambao kwa sasa wanapata maji kwa asilimia 23 tu ya mahitaji yao.

Waziri wa Maji na Umwagiliaji Profesa Makame Mbarawa amemueleza Rais Magufuli kuwa ujenzi wa mradi huo ambao umepangwa kukamilika mwezi Mei mwaka 2019, utagharimu shilingi bilioni 12.83 na ni sehemu ya mpango wa uboreshaji wa huduma za majisafi na usafi wa mazingira wa ziwa Victoria unaotekelezwa katika miji ya Mwanza, Musoma, Bukoba, Magu, Misungwi na Lamadi kwa gharama ya shilingi bilioni 276.

Fedha kwa ajili ya kutekeleza mradi huo zimetolewa kwa mkopo nafuu kutoka Shirika la Maendeleo la Ufaransa (AFD), Benki ya Uwekezaji ya Ulaya (EIB) na Serikali ya Tanzania.

Nao ujenzi wa barabara za mji wa Lamadi zenye jumla ya kilomita 6.26 umegharimu shilingi bilioni 9.192 ambapo barabara hizo zimewekewa taa, mifereji, njia za waenda kwa miguu na eneo la kuegesha magari lenye ukubwa wa mita 900.

Waziri wa Nchi Ofisi ya Rais, Tawala za Mikoa na Serikali za Mitaa (TAMISEMI) Selemani Jafo amemueleza Rais Magufuli kuwa pamoja na barabara hizo, serikali itajenga kituo cha mabasi na kilomita nyingine 1.5 za barabara, kununua gari la taka na kuandaa ramani ya mpango mji katika mji wa Lamadi kwa gharama ya shilingi Bilioni 6.47 na kwamba mradi kama huo unatekelezwa katika miji mingine 17 hapa nchini kwa gharama ya shilingi bilioni 561 ikiwa ni fedha za mkopo nafuu kutoka Benki ya Dunia.

Jengo la wagonjwa wa nje la hospitali ya Rufaa ya mkoa wa Simiyu limejengwa katika eneo la Nyaumata kwa ghamara ya shilingi Bilioni 1.8 na ni sehemu ya mradi mzima wa ujenzi wa miundombinu ya hospitali hiyo uliopangwa kugharimu shilingi Bilioni 11.

Waziri wa Afya, Maendeleo ya Jamii, Jinsia, Wazee na Watoto Ummy Mwalimu amesema kuwa serikali imetenga shilingi bilioni Tatu kwa ajili ya kujenga miundombinu mingine ya hospitali hiyo katika kipindi cha miezi Sita na kwa kuunga mkono ukamilishaji wa haraka wa hospitali hiyo Rais Magufuli ameahidi kuongeza fedha nyingine shilingi bilioni 4.

Ujenzi wa barabara ya Maswa – Bariadi yenye urefu wa kilomita 49.7 utagharimu shilingi bilioni 88.877 na barabara hiyo ni sehemu ya barabara ya Mwigumbi – Maswa – Bariadi – Lamadi yenye urefu wa kilomita 171.8.

Akizungumza katika miradi hiyo Rais Magufuli amezishukuru taasisi zote za kimataifa zilizotoa mikopo nafuu kwa Tanzania kwa lengo la kufanikisha miradi hiyo na ameahidi kuwa serikali itahakikisha miradi hiyo inatekelezwa vizuri na inaleta manufaa yanayotarajiwa kwa wananchi.

Rais Magufuli amewapongeza wananchi wa Simiyu kwa kupata miradi hiyo na ametoa wito kwa Watanzania wote kuunga mkono juhudi kubwa zinazofanywa na serikali katika kuwaletea maendeleo, ikiwa ni pamoja na kulipa kodi kwa kuwa fedha za kugharamia miradi hiyo zinatokana na kodi zao.

Amempongeza mkuu wa mkoa wa Simiyu,- Anthony Mtaka, viongozi na wakulima wa mkoa wa Simiyu kwa juhudi kubwa walizofanya katika kuongeza uzalishaji wa zao la pamba ambapo katika msimu uliopita kati ya kilo milioni 226 zilizozalishwa nchini, kilo milioni 120 zimezalishwa katika mkoa wa Simiyu.

Rais John Magufuli ametoa wito kwa Watanzania kutunza miradi mbalimbali ya maendeleo kwa kuwa serikali imekua ikitumia gharama kubwa kuitekeleza miradi hiyo.

Rais Magufuli ametoa wito huo mkoani Simiyu wakati akiweka jiwe la msingi la ujenzi wa mradi wa maji wa  Lamadi ikiwa ni sehemu ya ziara yake mkoani Simiyu.

Amesema kuwa ni muhimu kwa wakazi hao wa Simiyu kuutunza mradi huo muhimu wa maji ili uweze kudumu kwa muda mrefu pamoja na kuwahudumia kwa ufanisi kama ilivyokusudiwa.

Akiwa mkoani Simiyu, Rais Magufuli amesema kuwa anakerwa na vitendo vya uvuvi haramu kwa kuwa vina madhara makubwa kwa Taifa  na hivyo kutaka kukomeshwa kwa vitendo hivyo.

Rais Magufuli anaendelea na ziara yake mkoani Simiyu ambapo pamoja na mambo mengine anakagua na kuzindua miradi mbalimbali pamoja na kuzungumza na wakazi wa mkoa huo.

Rais John Magufuli amewaagiza viongozi wa wizara, mikoa na wilaya nchini kuhakikisha kero na malalamiko ya wananchi wanyonge yanatafutiwa ufumbuzi haraka.

Rais Magufuli ametoa agizo hilo wakati akizungumza na wananchi akiwa njiani kutoka Mugumu kwenda Tarime katika eneo la daraja la mto Mara Wilayani Serengeti, na Nyamongo, Nyamwaga na Tarime Mjini Wilayani Tarime ambako ameendelea na ziara yake mkoani Mara.

Kabla ya kutoa agizo hilo Rais Magufuli amekagua maendeleo ya ujenzi wa daraja la mto Mara lililopo katika barabara inayounganisha Mugumu na Tarime ambalo lina urefu wa mita 94, upana wa mita 9.9 ambalo ujenzi wake umefikia asilimia 75 na litagharimu shilingi Bilioni 8.5 hadi kukamilika kwake.

Akizungumza baada ya kukagua ujenzi wa daraja hilo, Rais Magufuli amesikiliza kilio cha mama mmoja Nyambura Nyamarasa aliyedai mazao yake yameliwa na mifugo, na kwamba juhudi za kufuatilia haki yake hazijafanikiwa huku akiendelea kuhangaika.

Rais Magufuli ameelezea kutofurahishwa na Mkuu wa wilaya ya Serengeti, Nurdin Babu ambaye hajachukua hatua licha ya mama huyo kumpelekea kilio chake na ameagiza vyombo vya dola vimkamate mtu anayedaiwa kulisha mifugo katika shamba la mama huyo na kumfikisha katika vyombo vya sheria.

“Viongozi niliowachagua na mnaofanya kazi na Serikali ninayoongoza, nataka kuona mnashughulikia matatizo ya watu wanyonge, sitaki kuona watu wenye fedha wanawanyanyasa masikini, na kweli leo nilitaka kukufukuza kazi Mkuu wa Wilaya, nakusamehe lakini kashughulikie haki ya huyo Mama na viongozi wote hakikisheni watu wanyonge hawanyanyaswi” amesema Rais Magufuli.

Katika Mji wa Nyamongo, wananchi wamemuomba Rais Magufuli awasaidie kutatua tatizo la maji huku wakibainisha kuwa kuna fedha shilingi Milioni 700 za mradi huo zimetumika ilihali maji hakuna, pia wamemuomba awasaidie kulipwa fidia waliopisha uwekezaji wa mgodi wa madini.

Hata hivyo Mkurugenzi Mtendaji wa Halmashauri ya Wilaya ya Tarime, -Apoo Tindwa amesema kuwa mradi wa maji wa shilingi Milioni 700 unatekelezwa na mwekezaji ambaye ni kampuni ya Acacia na kwamba halmashauri ya wilaya ya Tarime hawajaupokea kutokana na kutotoa maji.

Kuhusu madai ya kulipwa fidia ya ardhi kwa wananchi waliopisha uwekezaji wa kampuni ya madini ya Acacia, Naibu Waziri wa Madini Doto Biteko amesema kuwa zoezi hilo linakwamishwa na wananchi wenyewe kutokana na baadhi yao kupeleka madai wakati hawana maeneo huku akibainisha kuwa uhakiki uliofanywa na Wizara kwa majina 1,544 umebaini kuwa majina 720 yalikuwa hewa na majina 1,116 wahusika hawakujitokeza kuhakikiwa wakiwemo watumishi wa umma, hivyo akatoa wito kwa wananchi wanaowakwamisha wenzao kulipwa fidia waache kufanya hivyo.

Akizungumza na wananchi wa Nyamongo, Rais Magufuli amesema kuwa atafuatilia utekelezaji wa mradi wa maji unaogharamiwa na kampuni ya Acacia, lakini amewaagiza viongozi wa Tarime na mkoa wa Mara kumfuatilia mtu anayedaiwa kukusanya asilimia moja ya mapato ya mgodi wa Acacia badala ya malipo hayo kupatiwa vijiji sita vinavyozungumza mgodi huo ili aeleze fedha zote alizokusanya na zipo wapi.

“Mnaweza mkawa mnabishana na kupoteza muda kwa ajili ya hizo shilingi Milioni 700 wakati hapa kuna mtu anakusanya fedha nyingi zaidi kwa kujifanya yeye ni mbia kwa niaba ya vijiji sita, hizo fedha anazokusanya zingemaliza matatizo yote ya maji hapa Nyamongo na zingesaidia mahitaji mengine ya wananchi” amesisitiza Rais Magufuli.

Kabla ya kuondoka Nyamongo. Rais Magufuli amesikiliza maombi ya kupatiwa vitabu, mabweni na maabara kutoka kwa wanafunzi wa shule ya Sekondari Ingwe na papo hapo akaendesha harambee ya kuchangisha fedha ambapo amefanikiwa kupata shilingi Milioni 26 zikiwemo shilingi Milioni 5 alizotoa yeye papo hapo kwa ajili ya kusaidia shule hiyo.

Rais Magufuli pia amesalimiana na wakazi wa Nyamwaga ambao wameiomba serikali ihamishie Makao Makuu ya halmashauri ya wilaya ya Tarime Mjini hapo, na katika majibu yake amesema ombi hilo lifikishwe kwake kupitia hatua zinazostahili.

Aidha, Rais Magufuli amehutubia mkutano wa hadhara Mjini Tarime na kuwahakikishia wananchi wa mji huo kuwa serikali itaendelea kuwahudumia wananchi bila kuwabagua na kwamba kwa Tarime imetenga shilingi Bilioni 14 kwa ajili ya mradi mkubwa wa maji, imeanza ujenzi wa barabara ya Tarime – Mugumu kwa kiwango cha lami, imetoa shilingi milioni 400 za ujenzi wa kituo cha afya, inatoa fedha za elimu bila malipo kila mwezi na inaendelea kusambaza umeme kwa vijiji vyote visivyo na umeme.

Tarehe Nane Septemba, Rais Magufuli anaendelea na ziara yake katika Kanda ya Ziwa kwa kuutembelea mkoa wa Simiyu.

Watu 11 wamethibitika kufa katika ajali iliyohusisha magari matano yaliyokuwa yameongozana katika mteremko wa mlima wa Igawilo jijini Mbeya ambayo yamegongwa na gari jingine kubwa.

Kamanda wa Polisi wa mkoa wa Mbeya Urich Matei amesema kuwa chanzo cha ajali hiyo ni dereva wa lori aina ya Scania kushindwa kulimudu gari hilo ambalo lilikuwa na matatizo katika mfumo wa breki.

Kufuatia ajali hiyo Rais John Magufuli ametuma salamu za rambirambi kwa ndugu na jamaa za watu wote waliopoteza maisha katika ajali hiyo.

Rais John Magufuli amesisitiza kuwa ataendelea kuwatumikia Watanzania wote bila ya kujali tofauti zao za dini, ukabila na vyama.

Rais Magufuli ameyasema hayo kwenye mkutano wa hadhara katika viwanja vya chuo cha ualimu Tarime mkoani Mara, ikiwa ni sehemu ya ziara yake mkoani humo.

Amesema kuwa ataendelea kuwatembelea Watanzania katika maeneo mbalimbali nchini badala ya kusafiri nje nchi, lengo likiwa ni kutatua kero mbalimbali zinazowakabili.

Rais Magufuli amewashauri wakazi hao wa Tarime kutoingiza masuala ya kisiasa katika shughuli za maendeleo, kwani kwa kufanya hivyo ni kuchelewesha maendeleo.

Pia ameahidi kutekeleza miradi mbalimbali ya maendeleo wilayani Tarime ikiwa ni pamoja na ile ya afya, maji na barabara ili kuwaondolea adha inayowakabili wakazi wa wilaya hiyo.

Wakati wa mkutano huo, Rais Magufuli ameahidi kutoa Shilingi Bilioni Moja nukta Tano kwa ajili ya ujenzi wa hospitali ya wilaya ya Rorya.

Serikali imeunda kikosi maalum kitakachowachunguza watu wanaohujumu viwanda vya ndani vya sukari na kusababisha mlundikano wa sukari katika viwanda hivyo.

Kauli hiyo imetolewa bungeni jijini Dodoma na Waziri wa Viwanda, Biashara na Uwekezaji Charles Mwijage na kuongeza kuwa sukari nyingi imekua ikiingia nchini kinyume na taratibu, na kusababisha sukari ya ndani kukosa soko.

Waziri Mwijage pia ametolea ufafanuzi sukari inayozaliwa katika kiwanda cha sukari cha Mahonda kilichopo Zanzibar kwa kusema kuwa kwa sasa kiwanda hicho kinazalisha tani Elfu Nne wakati mahitaji halisi ya wakazi wa Zanzibar ni tani Elfu 20, hivyo haiwezi kuuzwa nje ya Zanzibar.

Waziri Mwijage amelazimika kutoa ufafanuzi huo baada ya baadhi ya Wabunge wa Bunge la Jamhuri ya Muungano kuhoji ni kwa nini sukari inayozaliwa na kiwanda hicho cha Mahonda cha Zanzibar inazuiliwa kuuzwa Tanzania Bara.