Wasomi mbalimbali nchini wamepokea kwa mtazamo tofauti hatua ya Marekani ya kutishia kuiwekea vikwazo Mahakama ya Kimataifa ya Uhalifu – ICC endapo itawashitaki askari wake wanaodaiwa kufanya vitendo vya uhalifu nchini Afghanstan.

Miongoni wa wasomi hao ni Profesa wa sheria  kutoka Chuo Kikuu cha Dar es salaam Chris Peter Maina na mhadhiri wa chuo cha Diplomasia, – Abbas Mwalimu.

Profesa Maina ambaye amekuwa katika kamisheni mbalimbali za sheria za kimataifa amesema kuwa haoni nguvu yoyote ya Marekani katika kuathiri utendaji kazi wa ICC.

Naye Abbas Mwalimu ameukosoa uamuzi huo wa Marekani na kusema kuwa kuna umuhimu kwa mahakama hiyo ikaangalia upya hasa katika kipindi hiki ambacho haiungwi mkono na mataifa mengi hasa yale makubwa.

Hivi karibuni Marekani ambayo ni moja ya nchi ambazo haiiungi mkono mahakama hiyo ya Kimataifa ya Uhalifu imetishia kuweka vikwazo dhidi ya mahakama hiyo endapo itaendelea na mikakati yake ya kuwashtaki raia wa nchi hiyo.

Mshauri wa masuala ya usalama ya kitaifa wa Marekani, -John Bolton amedai kuwa ICC  sio halali na kuapa kuwa nchi hiyo itafanya kila liwezekanalo kuwalinda raia wake.

Mahakama hiyo  ya Kimataifa ya Uhalifu  ambayo makao makuu yake yapo The Hague nchini Uholanzi, kwa sasa inafanya tathmini ili kuwafungulia mashtaka askari wa Marekani kwa madai ya kuwatesa wafungwa nchini Afghanistan.

Makamu wa Rais Samia Suluhu Hassan amesema serikali ya awamu ya tano imejipanga kutekeleza ahadi zake na kuwatahadharisha wananchi kuwa macho na matapeli wanaopita vijijini kuchangisha fedha kwa madai ya kuwapa kipaumbele katika mgao wa shilingi milioni hamsini kwa kila kijiji.

Makamu wa Rais ametoa kauli hiyo wakati akizungumza na wakazi wa kijiji cha Muzeze wilayani Buhigwe mkoani Kigoma.

Amesema fedha hizo hazijaanza kutolewa kutokana na kipaumbele kuelekezwa kwenye masuala mbalimbali ya maendeleo ya nchi.

Akiwa wilayani Buhigwe Makamu wa Rais Samia Suluhu Hassan pia amezindua shamba la miti katika kijiji cha Muzeze na kuwataka watanzania kutunza mazingira.

Makamu wa Rais amehitimisha ziara yake ya siku nne mkoani Kigoma.

Jeshi la Polisi mkoani Mwanza limetangaza kuanza msako dhidi ya waganga wa jadi wanaojihusisha na upigaji ramli chonganishi.

Kamanda wa Polisi mkoa wa Mwanza, Jonathan Shana ametangaza msako huo kufuatia ongezeko la mauaji hususani ya wanawake yanayodaiwa kusababishwa na imani za kishirikina.

Kamanda Shana ametangaza msako huo alipokutana na wakuu wa polisi, wakuu wa upelelezi wa wilaya na wakuu wa vituo vya polisi mkoani humo.

Amesema msako huo utahusisha pia wanaotoa vibali kwa waganga hao huku akitangaza kiama kwa maofisa na askari polisi wanaodaiwa kuwabambikizia kesi wananchi.

Kamanda wa Polisi mkoa wa Mwanza amewataka askari polisi kujiepusha na vitendo vya rushwa.

Serikali imetoa zaidi ya shilingi Bilioni 8.6 kulipa fidia wananchi wanaopisha upanuzi wa Ikulu ya Chamwino na Kiwanja cha Ndege cha Dodoma.

Kauli hiyo imetolewa na Mkuu wa mkoa wa Dodoma Dkt. Binilith Mahenge katika mkutano na maafisa wa viwanja vya ndege na Wakala wa Majengo Nchini TBA.

Mkurugenzi Idara ya Miliki Wakala wa Majengo Nchini -TBA, Baltazari Kimanyamo amewahakikishia wakazi wa Chamwino kuwa hakuna atakaye chukuliwa ardhi yake bila kulipwa fidia.

Kwa upande wake Mkurugenzi Mkuu Mamlaka ya Viwanja vya Ndege nchini – TAA, Richard Mayongela amesema kuna changamoto katika kiwanja hicho cha ndege hali inayosababisha ndege kushindwa kutua nyakati za usiku mkoani Dodoma.

Serikali imesema inatambua kuwa wafanyakazi wanahitaji nyongeza ya mishahara lakini zoezi hilo limekwama kutokana na zoezi la uhakiki la mwaka 2016/17 na kwamba kwa sasa wafanyakazi wanaingizwa kwenye kanzi data baada ya uhakiki.

Akijibu swali bungeni mjini Dodoma Naibu Waziri wa Nchi Ofisi ya Waziri Mkuu, Kazi, Vijana na Ajira Anthony Mavunde amesema nyongeza ya mishahara itafanyika baada ya zoezi la kanzi data kukamilika.

Katika hatua nyingine Waziri wa Nchi Ofisi ya Waziri Mkuu Sera, Bunge, Kazi, Vijana, Ajira na Wenye Ulemavu Jenista Mhagama ameliambia Bunge kwamba serikali imekuwa ikitenga shilingi bilioni kumi na tano kwa ajili ya kufanya tafiti na kutoa ujuzi kwa wananchi ili kufanikiwa katika ujenzi wa viwanda.