Pori la akiba la Selous bado linakabiliwa na changamoto ya ujangili ambapo kwa mwaka 2016/2017 jumla ya kesi 92 zilifunguliwa, zilizoripotiwa na mamlaka ya usimamizi wa wanyamapori nchini (TAWA).
Akizungumza na vyombo vya habari mkuu wa pori hilo kanda ya kaskazini magharibi Augustino Ngimilanga amesema sababu kubwa ya kuwepo kwa changamoto hiyo ni muingiliano kati ya wananchi na hifadhi.
Naibu Waziri wa Madini Stanslaus Nyongo amesema serikali inaangalia uwezekano wa kupunguza kodi katika vifaa na mitambo ya kuongeza thamani ya madini, ikiwa ni sehemu ya mkakati wa kushawishi wadau mbalimbali kuwekeza katika uongezaji thamani ya madini hapa nchini.
Akizungumza jijini Arusha alipotembelea kituo cha Jemolojia (TGC) kinachotoa mafunzo ya ukataji na ung’arishaji wa madini, Nyongo amesema lengo la serikali ni kuhakikisha madini yanapata thamani hapa nchini, hivyo ni vema kituo hicho kikaongeza juhudi ya kuzalisha wataalamu ili waweze kutumika katika uwekezaji huo.
Makamu wa Rais Samia Suluhu Hassan kwa niaba ya Rais Dkt.John Magufuli anatarajiwa kuzindua maadhimisho ya Tamasha la Urithi la Kitaifa jijini Dodoma, linaloandaliwa na Wizara ya Maliasili na Utalii.
Akizungumza na Waandishi wa habari jijini Dodoma Mkuu wa Mkoa huo Dkt. Binilith Mahenge amesema tamasha hilo linalenga kuongeza vivutio vya utalii ikiwa ni pamoja na mazao ya utamaduni na mali kale.
Dkt Mahenge amewataka wananchi wa Dodoma na Mikoa ya jirani kujitokeza kwa wingi katika uzinduzi huo.
Naye Mkurugenzi Mkuu wa Makumbusho ya taifa Audax Mabula amesema tamasha hilo litasadia kuongeza Watalii nchini.
Kamishna wa Huduma za Mamlaka ya Kudhibiti Dawa za Kulevya nchini Valite Mwashusa amesema Tanzania imefanikiwa kudhibiti matumizi na usambazaji wa dawa za kulevya kwa asilimia 90.
Kamishna Mwashusa ameyasema hayo jijini Dar Es Salaam alipokuwa akizungumza na waandishi wa habari kuhusu mkutano wa 28 wa nchi wanachama wa Umoja wa Afrika kuhusu dawa za kulevya unaotarajiwa kufanyika nchini kuanzia Septemba 17 hadi 21 mwaka huu.
Amesema Shirika la Umoja wa Mataifa linaloshughulikia mapambano dhidi ya dawa za kulevya, UNDC limeichagua Tanzania kuwa mwenyeji wa mkutano huo kutokana na imani yao katika juhudi zinazofanywa na Rais Dkt. John Magufuli za kupambana na dawa za kulevya.
Viongozi mbali mbali duniani leo Alhamisi wameungana na familia ya Koffi Annan, wakati shughuli za mazishi ya Katibu Mkuu huyo wa zamani wa Umoja wa Mataifa zikiendelea, katika nchi yake ya asili, Ghana.
Mamia ya waheshimiwa, wengi wao wakiwa wamevalia suti nyeusi zinazoashiria maombolezo, wamekusanyika katika kituo cha mikutano ya kimataifa jijini Accra, kuhitimisha siku tatu za maombolezo ya kitaifa (Ghana) kwa mwanadiplomasia aliyekuwa na heshima kubwa wakati wa uhai wake, Annan.
Viongozi hao ni pamoja na Katibu Mkuu wa Umoja wa Mataifa wa sasa, Antonio Guterres, ambaye aliongoza waombolezaji wote kutoka ‘ulimwengu’ wa kidiplomasia, huku kukiwa na wawakilishi kutoka Umoja wa Afrika (AU), Jumuia ya nchi za Afrika Magharibi (ECOWAS), na marais wengi kutoka bara la Afrika na nje ya Afrika.
Falme pia zilikuwepo, akiwemo ‘Princess’ Beatrix, malkia wa zamani wa Netherlands, aliyeongozana na mkwewe, Malkia Mabel, watu ambao walikuwa ni marafiki wa karibu wa marehemu Annan.
Annan aliongoza Umoja wa Mataifa kuanzia mwaka 1997 hadi 2006 akiwa ni mtu wa kwanza kutoka kusini mwa Sahara mwa bara la Afrika, kushika wadhifa huo.
Alikufa nyumbani kwake huko Switzerland Agosti 18 mwaka huu akiwa na umri wa miaka 80, baada ya kuugua kwa muda mfupi.
Imeelezwa kuwa kabla ya mwili wa Annan haujazikwa, leo atapata heshima ya kupigiwa mizinga 17.
Serikali imesema itamchukulia hatua za kisheria askari polisi atakayebainika kufanya vitendo vya unyayasasi dhidi ya watu wanaowakamata kwa tuhuma mbalimbali.
Akizungumza bungeni jijini Dodoma Waziri wa Mambo ya Ndani ya Nchi.Kangi Lugola amesema kutokana na uwepo wa malalamiko dhidi ya baadhi ya askari kudaiwa kuwatesa wananchi kwa makusudi atafanya ziara nchi nzima kubaini ukubwa wa tatizo hilo
Serikali imesema kuwa haijavunja mkataba wowote na wanufaika wa mikopo ya elimu ya juu bali makato ya asilimia 15 kutoka kwenye mshahara ghafi wa mnufaika wa mkopo huo ni ya kisheria.
Kauli hiyo ya serikali imetolewa bungeni, jijini Dodoma na Waziri wa Elimu, Sayansi na Teknolojia Profesa Joyce Ndalichako alipokuwa akijibu swali la Mbunge wa Mbozi,- Paschal Haonga juu ya kinachodaiwa kuwa serikali imevunja mkataba kinyume na makubaliano kwa kuwa wakopaji walisaini mkataba wa asilimia Nane na siyo 15.
“Kilichofanyika mwaka 2016 katika marekebisho ya Sheria ya Bodi ya Mikopo (SURA 178) ni kuiboresha sheria hii kwa kutaja kiwango mahsusi cha asilimia 15 kinachopaswa kukatwa kutoka mshahara ghafi wa mnufaika. Awali, kabla ya marekebisho hayo, kifungu cha 7(1) (h), kiliipa Serikali mamlaka ya kupanga kiwango cha makato na kubadilisha kiwango pale itakapoona inafaa,” amefafanua Profesa Ndalichako.
Ameongeza kuwa serikali inafahamu umuhimu wa kuwashirikisha wadau katika marekebisho ya sheria yoyote, hivyo katika mchakato wa marekebisho ya Sheria ya Bodi ya Mikopo ya Wanafunzi wa Elimu ya Juu (SURA 178) ya mwaka 2016, wadau mbalimbali walishirikishwa.
Amewataja wadau walioshirikishwa kuwa ni pamoja na wawakilishi wa vyama vya wafanyakazi TUGHE na TUCTA, Chama cha Mawakili nchini (TLS) pamoja na wanafunzi kutoka Taasisi za Elimu ya Juu kama vile Chuo Kikuu cha Dodoma, Chuo cha Elimu ya Biashara – Dodoma na Chuo cha Mipango.
Aidha Profesa Ndalichako amesema kuwa makato hayo ya asilimia 15 yana lengo la kuhakikisha fedha zinazotolewa na serikali zinarejeshwa kwa wakati ili ziweze kuwasomesha Watanzania wengine wahitaji.
Ametoa wito kwa wanufaika wote wa mikopo ya Elimu ya Juu kuhakikisha kuwa wanarejesha kwa wakati mikopo waliyokopeshwa na Bodi hiyo ili iweze kusaidia watoto wengine wenye uhitaji.
Rais John Magufuli amewaapisha viongozi watatu aliowateua hivi karibuni.
Hafla ya kuapishwa kwa viongozi hao imefanyika katika Ikulu ya Chamwino mkoani Dodoma na kuhudhuriwa na viongozi mbalimbali akiwemo Makamu wa Rais Samia Suluhu Hassan, Waziri Mkuu Kassim Majaliwa, Spika wa Bunge Job Ndugai na Katibu Mkuu Kiongozi Balozi John Kijazi.
Viongozi walioapishwa ni Katibu Mkuu Wizara ya Afya, Maendeleo ya Jamii, Jinsia, Wazee na Watoto anayeshughulikia Maendeleo ya Jamii, Jinsia, Wazee na Watoto Dkt John Jingu, Balozi wa Tanzania nchini Uganda Dkt Aziz Mlima na Mkurugenzi Mkuu wa Taasisi ya Kuzuia na Kupambana na Rushwa Nchini (TAKUKURU) Diwani Athumani.
Akizungumza baada ya kuwaapisha viongozi hao Rais Magufuli amemuagiza Dkt Jingu kwa kushirikiana na viongozi wengine wa Wizara ya Afya, Maendeleo ya Jamii, Jinsia, Wazee na Watoto kufuatilia usajili na utendaji kazi wa mashirika yasiyo ya kiserikali na kuhakikisha yanafanya kazi kwa kuzingatia sheria ambazo pamoja na mambo mengine zinayataka kuendesha shughuli zao kwa uwazi hususani masuala ya mapato na matumizi ya fedha za ufadhili wa shughuli zake.
Rais Magufuli pia amemtaka Balozi wa Tanzania nchini Uganda Dkt Mlima kusimamia vizuri ushirikiano wa Tanzania na Uganda hasa biashara na uwekezaji unaoendelea kati ya nchi hizo mbili na kuhakikisha Tanzania inanufaika na ushirikiano huo.
Kwa upande wa Mkurugenzi Mkuu wa TAKUKURU, – Diwani Athumani, Rais Magufuli amemuagiza kuongeza kasi ya kushughulikia tatizo la rushwa nchini kwa kuhakikisha wote wanaokabiliwa na tuhuma za kujihusisha na rushwa wanafikishwa mahakamani na sheria inachukua mkondo wake.
Rais Magufuli pia amemtaka Mkurugenzi Mkuu huyo wa TAKUKURU kuangalia upya muundo wa taasisi hiyo ili uweke bayana majukumu ya Naibu Mkurugenzi Mkuu wa TAKUKURU na kuhakikisha watendaji wa taasisi hiyo wanaoonekana kutofanya kazi kwa tija na kujihusisha na vitendo vya rushwa wanachukuliwa hatua ikiwa ni pamoja na kuondolewa kazini na kufikishwa mahakamani.
“Nataka ukaisafishe TAKUKURU, kuna baadhi ya wafanyakazi wa TAKUKURU wanajihusisha na rushwa, kawaondoe, nataka kuona TAKUKURU inashughulikia rushwa kwelikweli hasa rushwa kubwakubwa, ukipita huko vijijini wananchi wanateseka sana, wananyanyaswa na kuna dhuluma nyingi sana, na tatizo kubwa ni rushwa” amesisitiza Rais Magufuli.
Viongozi hao walioapishwa na Rais Magufuli pia wamekula kiapo cha uadilifu kwa watumishi wa umma kilichoongozwa na Kamishna wa Maadili Jaji Mstaafu Harold Nsekela na baada ya viapo vyao wamemshukuru Rais kwa kuwateua na wamemuahidi kufanya kazi kwa juhudi, maarifa na kwa kutanguliza maslahi ya Taifa.