Mwenyekiti wa klabu ya Manchester City ya nchini England, – Khaldoon Al Mubarak amesema kuwa safari ya klabu hiyo bado haijakamilika licha ya kutoa taarifa ya mapato ya klabu hiyo yenye faida ya Pauni Milioni 500 kwa msimu uliopita.

Taarifa ya iliyotolewa na klabu hiyo imesema kuwa hadi kufikia June 30 mwaka huu, klabu hiyo imetengeza faida ya Pauni Milioni 500 zinazoifanya City kuwa klabu ya pili kwenye ligi ya England nyuma ya Manchester United kuweka rekodi ya kutengeza kiasi kikubwa cha fedha.
Taarifa hiyo pia inaonyesha kuwa huu ni msimu wa Nne mfululizo klabu hiyo inatengeneza faida ambapo kwa mwaka huu imepata faida ya Pauni Milioni 10.4 huku mapato yatokanayo na mishahara ikiwa ni asilimia 52.

Taarifa hiyo inakuja ikiwa miezi minne imepita tangu Man City watwae taji la ligi ya England wakiwa timu ya kwanza kuweka rekodi ya kuvuna alama 100 na Al Mubarak amesema kuwa safari haijakamilika kwa kuwa wana malengo makubwa zaidi huku wakihitajika kufanya vizuri kwenye michuano ya ligi ya mabingwa Barani Ulaya.

Real Madrid, Barcelona, Bayern Munich na Manchester United ndiyo vilabu vinavyotengeneza faida kubwa duniani kuliko Man City ambao wameongeza ukubwa wa uwanja wao wa Etihad kufikia uwezo wa kubebea watazamaji Elfu 55.

Shirikisho Soka Nchini (TFF) limesema kuwa tiketi za mchezo baina ya watani wa jadi Simba na Yanga utakaopigwa Septemba 30 mwaka huu, zitaanza kuuzwa mapema ambapo kiingilio cha juu kwenye mtanange huo kikiwa ni Shilingi elfu 30 na cha chini kikiwa ni Shilingi elfu Saba.

Msemaji wa TFF Clifford Ndimbo amesema kuwa tiketi za mchezo huo utakaopigwa kwenye nyasi za dimba la Taifa jijini Dar es salaam zitaanza kuuzwa Septemba 20 huku kukiwa na taratibu mbalimbali za kuingia uwanjani zitakazosaidia kupunguza matatizo yanayoweza kujitokeza.

Watani wa jadi Simba na Yanga watakutana kwa mara ya kwanza tangu kuanza kwa Ligi Kuu Tanzania Bara msimu wa mwaka 2018/2019, ambapo mara ya mwisho zilipokutana kwenye Ligi Kuu Yanga iliambulia kipigo cha bao moja kwa bila.

Dereva wa kampuni ya Ferari,- Sebastian Vettel amesema kuwa adui yake mkubwa katika kinyang’anyiro cha kuwania taji la mbio za langalanga msimu huu baina yake na dereva wa Marcedes, – Lewis Hamilton ni yeye mwenyewe.

Vettel ambaye yupo alama 30 nyuma ya mpinzani wake Hamilton, amefanya makosa kadhaa msimu huu yaliyotoa faida kubwa kwa Marcedes na amesema bado ana nafasi ya kufanya vema kutokana na ubora wa kampuni ya Ferari inayoongoza kwa kuwa gari lenye kasi zaidi kwenye mbio za langalanga kulinganisha na Marcedes.

Mjerumani huyo amesema kuwa wapo kwenye nafasi nzuri ya kushinda na adui yao mkubwa ni wao wenyewe kama kampuni na si mtu mmoja kama watu wanavyofikiri na kinachohitajika ni umakini wakati wote wa mchezo ili kuepuka makosa yatakayotoa nafasi kwa wapinzani kushinda kama ilivyokuwa kwenye mashindano kadhaa yaliyopita.

Kwa upande wake bingwa mtetezi wa mbio za langalanga, Lewis Hamilton amesema kuwa ufundi wa kwenye usukani ndiyo utadhihirisha nani ni mkali na si maneno ya nje na kuongeza kuwa bado kuna alama nyingi kuelekea kwenye ubingwa.

Vettel na Hamilton ni wapinzani wakubwa kwenye mbio za langalanga na Vettel alianza vema msimu huu kabla ya Hamilton kuzinduka katika mashidano Matano yaliyopita ambapo ameshinda matatu na sasa kila mmoja anapambana kushinda mashindano yanayofuata ili kujiweka kwenye mazingira mazuri ya kushinda taji la dunia.