Muamuzi wa mchezo wa tenisi Mohamed Lahyani raia wa Sweden amesimamishwa kuchezesha mashindano mawili yajayo ya China Open na Shanghai Masters yatakayofanyika mwezi Oktoba mwaka huu baada ya kupatikana na kosa la kumsaidia mcheza Tenisi,-Kick Kyrgios wa Australia kwenye mashindano yaliyopita ya US Open.

Lahyani alisikika wakati wa mapumziko akimwambia Kyrgios kuwa nataka kukusaidia wakati wa mpambano wake na Pierre – Hugues Herbert wa Ufaransa na baada ya kauli hiyo Kyrgios aliweza kutoka nyuma hadi kuibuka mshindi.

Waandaaji wa mashindano ya US Open wamemtuhumu muamuzi huyo kwa kusema kuwa alienda kinyume na taratibu za mashindano hayo, lakini wamempa tena nafasi ya kuchezesha kwenye mashindano hayo mwaka 2019.

Lahyani atakuwa huru kuchezesha tena mashindano ya tenisi kuanzia mashindano ya Stockholm Open.

Lionel Messi amekua mchezaji wa kwanza kufunga goli la kwanza kwenye michuano ya ligi ya mabingwa Barani Ulaya msimu huu na pia kuwa mchezaji wa kwanza kufunga magoli matatu kwenye mchezo mmoja yaani Hat – Trick wakati timu yake ya FC Barcelona ilipoifunga PSV ya Uholanzi kwa bao nne kwa bila.

Messi ambaye kwa sasa ni nahodha wa miamba hiyo ya Catalunya, alianza kufungua milango ya PSV kwenye dakika 31 ya mchezo pale alipofunga kwa mpira wa adhabu ya nje ya kumi na nane na kuongeza magoli mengine mawili kwenye dakika za 77 na 87 na goli lingine la Barcelona lilitiwa kimiani na Ousmane Dembele.

Hadi sasa Messi amefunga Hat – Trick nane kwenye michuano hiyo ya ligi ya mabingwa Barani Ulaya na kwa msimu huu tu amefunga magoli saba kwenye michezo sita aliyocheza.

Kwa ujumla Messi amefunga magoli 104 kwenye ligi ya mabinwa Barani Ulaya kwa michezo 14 aliyocheza akiwa na timu hiyohiyo ya Barcelona na kufikia rekodi iliyowekwa na nyota wa zamani wa Real Madrid, -Raul Gonzalez.

Ligi Kuu Tanzania Bara inaingia kwenye raundi yake ya Tano huku timu zingine zikicheza michezo yake ya raundi ya tatu kwenye msimu wa 2018/2019.

Kwenye dimba la Taifa jijini Dar es salaam, mabingwa wa kihistoria Yanga watakuwa wenyeji wa wagosi wa kaya Coastal Union ya Tanga ambayo imerejea msimu huu kwenye ligi kuu baada ya kuikosa kwa misimu miwili.

Yanga ambao mchezo huo dhidi ya Coastal Union utakuwa wa tatu kwao, wameshashinda michezo miwili iliyocheza, huku Coastal Union ikicheza michezo minne na imeshinda mchezo mmoja na kutoka sare michezo mitatu.

Huko Musoma – Mara kwenye dimba la kumbukumbu ya Karume, timu ngeni kwenye ligi kuu Biashara United yenyewe itawaalika matajiri wa Chamazi Azam FC huku wanakuchele Ndanda FC baada ya kutoka sare na mabingwa watetezi Simba safari hii wana kibarua kingine kigumu mbele ya mabingwa wa kombe la Shirikisho, -Mtibwa Sugar.

Kwenye dimba la Samora mjini Iringa, wanapaluhengo Lipuli FC ambayo haijashinda mchezo hata mmoja ikiwa imetoka sare kwenye michezo yake yote minne iliyocheza safari hii, inakipiga na timu inayoburuza mkia kwenye ligi kuu Alliance FC ya Mwanza.

Jijini Mbeya, Wagonga nyundo au watoza ushuru wa jiji hilo Mbeya City watawaalika wazee wa kupapasa Ruvu Shooting na mchezo wa mwisho kwa Septemba 19 utapigwa kwenye migodi ya Almasi huko Mwadui mkoani Shinyanga ambapo wenyeji Mwadui FC watawaalika vinara wa ligi kuu kwa sasa JKT Tanzania.