Rais Dkt. John Magufuli ameagiza kuanzia kesho bendera za serikali kupepea nusu mlingoti kwa siku tatu hadi Septemba 24 mwaka huu.

Akizungumza jijini Dodoma kwa niaba ya Rais Dkt. Magufuli, Katibu Mkuu Kiongozi Balozi John Kijazi ameagiza watu wote wanaohusika na shughuli za uendeshaji wa kivuko cha MV Nyerere kukamatwa na kuhojiwa na watakaokutwa na hatia wachukuliwe hatua kwa mujibu wa sheria.

Aidha Balozi Kijazi amebainisha kuwa mpaka sasa watu 127 wamekufa katika kivuko hicho.

Rais wa Zanzibar na Mwenyekiti wa Baraza la Mapinduzi Dkt Ali Mohamed Shein amemtumia salamu za rambirambi mkuu wa mkoa wa Mwanza, – John Mongela kufuatia ajali ya kuzama kwa kivuko cha MV Nyerere na kusababisha vifo pamoja na majeruhi.

Dkt Shein ameeleza kuwa amepokea kwa mshtuko na huzuni taarifa ya ajali ya kuzama kivuko hicho na kuongeza kuwa yeye binafsi pamoja na wananchi wote wa Zanzibar na Tanzania nzima wana simanzi kubwa kufuatia msiba huo mkubwa wa kitaifa.

“Kwa hakika msiba huu umetugusa Watanzania sote, ni msiba wetu kwa sababu waliofikwa na janga hili ni ndugu zetu, Watanzania wenzetu”, amesema Dkt Shein.

Amesema kuwa kwa vile ajali ni moja kati ya matukio ambayo mwanadamu hana budi nayo, anamuomba Mwenyezi Mungu azijalie roho za wale wote waliopoteza maisha zipumzike mahala pema.

Kwa wale ambao wameweza kuokolewa wakiwa hai, amemuomba Mwenyezi Mungu awape nafuu ili waweze kurudi katika hali zao za kawaida kiafya na waendelee na shughuli zao za kila siku za kujenga nchi yao.

“Watanzania tunatakiwa kuendelea kuwa na utulivu, umoja na mshikamano wakati huu ambapo jitihada za kutafuta miili zaidi ya waliopata ajali hiyo zikiendelea”,ameeleza Dkt Shein.

Kivuko cha MV Nyerere kinachotoa huduma zake kati ya Bugorora na Ukara wilayani Ukerewe mkoani Mwanza kilizama Alhamisi  Septemba 20 mwaka huu kikiwa katika safari zake za kawaida ambapo hadi sasa miili 126 imeopolewa.

Miili 126 imeopolewa hadi hivi sasa kufuatia  ajali ya kuzama kwa kivuko cha MV Nyerere iliyotokea  hapo jana Septemba 20.

Idadi hiyo imetangazwa jijini Mwanza na Waziri wa Ujenzi, Uchukuzi na Mawasiliano Mhandisi Isack Kamwelwe katika mahojiano yake na Shirika la Utangazaji Tanzania (TBC).

Amesema kuwa miili zaidi imepatikana kufuatia kazi ya uokoaji inayoendelea hivi sasa katika eneo kilipozama kivuko hicho.

Mhandisi Kamwelwe amesema kuwa taarifa kamili ya serikali itatolewa baadae hii leo kama zoezi la uokoaji litaendelea hadi kesho ama litasitishwa hii leo.

Kwa mujibu wa Waziri Kamwelwe, hadi sasa miili 31 imekwishatambuliwa.

Kivuko cha MV Nyerere kinachotoa huduma zake kati ya Bugorora na Ukara wilayani Ukerewe mkoani Mwanza kilizama wakati kikiwa katika safari zake za kawaida.

Waziri Mkuu Kassim Majaliwa amekatisha ziara yake mkoani Dodoma na kuelekea wilayani Ukerewe mkoani Mwanza kuwafariji wananchi waliopatwa na maafa kufuatia kuzama kwa kivuko cha MV Nyerere.

Waziri Mkuu Majaliwa ambaye alikuwa na ziara ya kikazi ya siku saba mkoani Dodoma ametangaza uamuzi huo wakati akizungumza na wakazi wa kijiji cha Chandama wilayani Chemba ambao walisimamisha msafara wake ili wamueleze kero kubwa ya maji inayowakabili.

Waziri Mkuu alikuwa akitokea kijiji cha Itolwa kata ya Jangalo ambako alikuwa na mkutano wa hadhara na kuwaeleza wakazi wa vijiji vya Itolwa, Mapango na Chandama kuwa serikali imetenga shilingi bilioni tano nukta sita kwa ajili ya ujenzi wa miradi ya maji kwenye wilaya hiyo.

Makamu wa Rais Samia Suluhu Hassan amekutana na kufanya mazungumzo na Balozi wa Uingereza nchini Sarah Cooke ambapo pamoja na mambo mengine balozi huyo amempa taarifa Makamu wa Rais juu ya ziara ya Mwanamfalme William wa Uingereza atakayewasili nchini wiki ijayo kwa ziara yake ya siku tatu.

Ziara ya Mwanamfalme William nchini ina lengo la kujifunza mambo ya uhifadhi wa wanyamapori kama sehemu ya maandalizi ya mkutano wa dunia unaohusu masuala ya uhifadhi wa wanyamapori utakaofanyika jijini London nchini Uingereza mwezi Oktoba mwaka huu.

Balozi Cooke pia amemjulisha Makamu wa Rais Samia Suluhu Hassan utekelezaji wa makubaliano mbalimbali yaliyofikiwa kwenye mkutano wa wakuu wa nchi na serikali wa nchi za Jumuiya ya Commonwealth uliofanyika mwezi aprili mwaka huu jijini London.

Viongozi wa kitaifa wa vyama vya siasa nchini wametakiwa kutekeleza majukumu yao kwa maslahi ya Taifa na kuepuka kuanzisha vyama kwa maslahi binafsi.

Kauli hiyo imetolewa jijini Dodoma na Naibu Msajili wa vyama vya siasa nchini Mohammed Ally Ahmed wakati wa kufunga mafunzo kwa viongozi wa kitaifa wa vyama vya siasa yaliyofanyika kwa muda wa siku mbili  kwa lengo la kuwajengea uwezo viongozi hao wa namna ya kuendesha vyama vyao kama taasisi.

“Linapotokea zuri basi tuseme hili ni zuri na linapotokea baya tuseme hili lina tatizo kwa maslahi mapana ya taifa letu, utitiri wa vyama vya siasa pekee hautasaidia taifa kama vyama hivyo havitakuwa na nguvu ya kufanya kazi ama kuonyesha uzalendo wa kuendesha taifa”, amesisitiza Ahmed.

Naibu Msajili huyo wa vyama vya siasa nchini ametoa wito kwa viongozi hao wa kitaifa wa vyama vya siasa kuunga mkono jitihada za serikali kupitia Ofisi ya Msajili wa Vyama vya Siasa za kuvijengea uwezo vyama hivyo  na kuongeza kuwa mafunzo ya aina hiyo yatasaidia kubadili mawazo na mitazamo ya kiutendaji wa shughuli za vyama vya siasa nchini ili  kujielekeza katika mapinduzi makubwa ya kiuchumi na kisiasa.

Baadhi ya mada zilizowasilishwa wakati wa mafunzo hayo ni jinsi ya kuendesha chama kama taasisi, utaratibu wa kukagua hesabu za fedha za vyama vya siasa na mambo muhimu ambayo vyama vinapaswa kuzingatia.

Mafunzo hayo ni mwendelezo wa mafunzo ambayo Ofisi ya Msajili wa vyama vya siasa nchini inaendelea kuyatoa kwa vyama vya siasa ili kusaidia vyama hivyo kutekeleza majukumu yake kwa mujibu wa sheria ya vyama vya siasa na kujiendesha kama taasisi.

Mkuu wa Jeshi la Polisi Nchini Simon Sirro amesema kuwa utambuzi wa miili ya watu waliokufa maji kufuatia kuzama kwa kivuko cha MV Nyerere inaendelea hivi sasa.

Akizungumza katika eneo ilipotokea ajali hiyo, IGP Sirro amewataka Watanzania wote kuendelea kuwa watulivu wakati shughuli hiyo ikiendelea na kusimamiwa na kamati ya ulinzi na usalama ya mkoa wa Mwanza.

Kivuko cha MV Nyerere kinachotoa huduma zake kati ya Bugorora na Ukara wilayani Ukerewe mkoani Mwanza kilizama Alhamisi Septemba 20 mwaka huu kikiwa katika safari zake za kawaida.

Habari kutoka mkoani Mwanza zinasema kuwa kati ya watu 37 waliookolewa baada ya kutokea kwa ajali hiyo na kulazwa hospitalini wakipatiwa matibabu, 25 wameruhusiwa.