Makamu wa Rais Samia Suluhu Hassan amekutana na kufanya mazungumzo na Mkurugenzi mkazi wa Benki ya Maendeleo ya Afrika (AfDB) nchini Dkt Alex Mubiru ambaye alifika ofisini kwa Makamu wa Rais kujitambulisha.

Wakati wa mazungumzo yao, Makamu wa Rais amesema kuwa AfDB imeahidi kuendelea kushirikiana na kuisaidia Tanzania kutokana na hatua kubwa ya kimaendeleo ambayo imeonyesha.

Kwa upande wake Mkurugenzi Mkazi huyo wa Benki ya Maendeleo ya Afrika Dkt Alex Mubiru amesema kuwa wawakilishi wa AfDB wapo nchini kwa lengo la kuisaidia serikali pamoja na watu wake.

Wakati huo huo Makamu wa Rais amekutana na kufanya mazungumzo na balozi wa Kenya nchini Dan Kazungu ambaye alifika ofisini kwa kwake kwa lengo la kujitambulisha.
Makamu wa Rais Samia Suluhu Hassan pia amekutana na balozi wa Japan nchini Masaharu Yoshida ambaye amemaliza muda wake nchini.

Katika mazungumzo yao, Makamu wa Rais amemshukuru balozi Yoshida kwa ushirikiano wote alioutoa kwa kipindi chote alichokuwa hapa nchini.

Naye Balozi Yoshida ameishukuru serikali pamoja na raia wote wa Tanzania kwa ushirikiano mzuri waliompa kwa kipindi chake alichohudumu kama balozi wa Japan hapa nchini.

Rais John Magufuli amemteua Dkt Damas Ndumbaro kuwa Naibu Waziri wa Wizara ya Mambo ya Nje na Ushirikiano wa Afrika Mashariki.

Dkt Ndumbaro ambaye ni Mbunge wa Songea mjini mkoani Ruvuma anachukua nafasi ya Dkt Susan Kolimba ambaye uteuzi wake umetenguliwa.

Wakati huo huo Rais Magufuli amemteua Dkt Faraji Mnyepe kuwa Katibu Mkuu wa Wizara ya Mambo ya Nje na Ushirikiano wa Afrika Mashariki.

Dkt Mnyepe anachukua nafasi ya Profesa Adolf Mkenda ambaye ameteuliwa kuwa Katibu Mkuu wa Wizara ya Maliasili na Utalii.

Profesa Mkenda amechukua nafasi ya Meja Jenerali Mstaafu Gaudence Milanzi ambaye amestaafu.

Uteuzi wa viongozi hao umeanza leo Septemba 26 na tarehe ya kuapishwa kwao itatangazwa baadaye.

Mwili mmoja kati ya minne ya watu waliokufa kwenye ajali ya kuzama kwa kivuko cha MV Nyerere katika kisiwa cha Ukara wilayani Ukerewe mkoani Mwanza na kushindwa kutambuliwa na baadaye kuzikwa, umetambuliwa na ndugu zake.

Waziri wa Nchi, Ofisi ya Waziri Mkuu, Sera, Bunge, Kazi, Vijana, Ajira na Wenye Ulemavu Jenista Mhagama amesema kuwa mwili huo ambao ni wa mwanamke umetambuliwa baada ya kufanyika kwa vipimo vya vinasaba (DNA).

Waziri Mhagama amesema kuwa vipimo hivyo vimefanyika baada ya ndugu wa marehemu huyo ambao ni pamoja na mume na watoto kufika kisiwani Ukara wakitokea wilayani Muleba mkoani Kagera na kusema kuwa ndugu yao ni miongoni mwa watu waliokufa maji katika ajali hiyo.

Amesema kuwa baada ya vipimo kuthibitisha kuwa marehemu huyo ni ndugu yao, familia hiyo imeonyeshwa kaburi la ndugu yao na kwamba wako huru kufanya taratibu nyingine zozote kama zile za kiimani, kimila na kikabila endapo watahitaji.

Waziri huyo wa Nchi, Ofisi ya Waziri Mkuu, Sera, Bunge, Kazi, Vijana, Ajira na Wenye Ulemavu amesisitiza kuwa utaratibu mzuri umewekwa ambao utasaidia kutambua miili mingine mitatu ambayo nayo ilizikwa wakati wa mazishi ya kitaifa, na endapo ndugu watajitokeza itafanyiwa vipimo na baadae ndugu hao wa marehemu wataonyeshwa makaburi ya wapendwa wao.

Wakati wa mazishi hayo ya kitaifa yaliyofanyika kisiwani Ukara, miili Tisa ilizikwa, mitano ni baada ya kutambuliwa na ndugu zao kuridhia izikwe katika eneo hilo, huku mingine minne ikizikwa baada ya kutotambuliwa.

Michango zaidi inaendelea kutolewa na taasisi pamoja na watu mbalimbali kufuatia kuzama kwa kivuko cha MV Nyerere Septemba 20 mwaka huu katika kisiwa cha Ukara wilayani Ukerewe mkoani Mwanza.

Akizungumza na TBC kutoka kisiwani Ukara, Waziri wa Ujenzi, Uchukuzi  na Mawasiliano Mhandisi Isack Kamwelwe amesema kuwa mpaka sasa akaunti ya maafa imepokea jumla ya shilingi milioni 557.

Amesema miongoni mwa michango iliyopokelewa hii leo, ni pamoja na shilingi milioni 125 kutoka benki ya KCB na shilingi milioni kumi kutoka Benki ya Posta.

Kwa mujibu wa Mhandisi Kamwelwe, kwa siku ya leo pekee akaunti hiyo ya maafa  imepokea jumla ya shilingi milioni 160.

Kwa upande wake, Waziri wa Nchi, Ofisi ya Waziri Mkuu, Sera, Bunge, Kazi, Vijana, Ajira na Wenye Ulemavu Jenista Mhagama amesisitiza kuwa fedha hizo zitatumika kama ilivyokusudiwa.

Kuhusu kazi ya kunasua kivuko hicho cha MV Nyerere, Mkuu wa Majeshi ya Ulinzi Jenerali Venance Mabeyo amesema kuwa kazi hiyo iko katika hatua ya mwisho ambayo ni kukinyanyua na kwamba kitanyanyuliwa muda mfupi ujao.