Waziri wa Fedha na Mipango Dkt  Philip Mpango ameiagiza Mamlaka ya Bandari nchini (TPA) kuharakisha mchakato wa kufunga mita za kupima mafuta – Flow Meters katika bandari ya Tanga na kuharakisha urasimishaji wa bandari bubu nne katika mwambao wa bahari wa Tanga ili kudhibiti magendo na upotevu wa mapato ya serikali.

Dkt Mpango ametoa agizo hilo alipotembelea bandari ya Tanga kwa lengo la kujionea utendaji kazi wa bandari hiyo inayotajwa kuwa moja ya eneo muhimu na chanzo kikubwa cha mapato ya serikali lakini mchango wake hauonekani ipasavyo.

Amesema kuwa mchakato wa kumpata mzabuni wa kufunga mitambo hiyo umechukua muda mrefu licha ya kwamba uongozi wa juu wa serikali ulitoa maelekezo ya kufungwa mara moja kwa flow meter hizo.

Kaimu Meneja wa Bandari ya Tanga, -Donald Ngaile amemweleza Dkt Mpango kuwa mfumo wa kupima mafuta kwa njia ya flow meter haufanyikazi tangu ufungwe miaka mitatu iliyopita kwa sababu ya uchakavu.

Dkt Mpango pia ameuhimiza uongozi wa TPA kuharakisha urasimishaji wa bandari nne bubu zilizoko bahari ya hindi katika mwambao wa Tanga kwenye wilaya za Muheza, Pangani na Mkinga ili kudhibiti biashara ya magendo inayoikosesha serikali mapato yatokanayo na kodi.

Ujenzi wa meli mpya ya abiria ya MV Mbeya II inayotarajiwa kutatua changamoto za usafiri wa abiria pamoja na mizigo katika mwambao wa ziwa Nyasa umefikia asilimia 80.

Meneja wa bandari katika ziwa Nyasa,- Abed Gallus amesema kuwa meli hiyo itakayokua ya kwanza ya kisasa ya abiria itaunganisha mikoa mitatu ya Mbeya, Njombe na Ruvuma pamoja na nchi jirani za Malawi na Zambia.

Gallus amesema kuwa ujenzi wa meli hiyo unaofanywa na kampuni ya kizalendo ya Songoro Marine ni moja ya juhudi zinazofanywa na Mamlaka ya Bandari Nchini (TPA) katika kuboresha shughuli za usafirishaji wa abiria pamoja na mizigo majini.

“Ujenzi wa meli hii ya abiria, ni sehemu ya utekelezaji wa ujenzi wa meli tatu za TPA katika ziwa Nyasa zinazolenga kutatua changamoto za usafiri wa abiria na mizigo majini,” amesema Gallus.

Ameongeza kuwa,  TPA ilianzisha mradi wa meli tatu zikiwemo mbili za mizigo zenye uwezo wa kubeba tani elfu moja na moja ya abiria yenye uwezo wa kubeba abiria 200 na mizigo tani 200.

Ujenzi wa meli hiyo ya abiria ya MV Mbeya II unatarajiwa kukamilika mwezi Disemba mwaka huu kwa gharama ya shilingi bilioni tisa.

Meli hiyo mpya ya MV Mbeya II inatarajia kufanya safari zake katika bandari mbalimbali kongwe na nyingine mpya zitakazoanzishwa na TPA katika mwambao wa ziwa Nyasa, lengo likiwa ni kuleta ufanisi katika usafirishaji wa abiria na mizigo.

Waziri wa Ujenzi Uchukuzi na Mawasiliano Isack Kamwelwe amesema zoezi la kukinasua kivuko cha MV Nyerere kilichozama kwenye ziwa Victoria katika kisiwa cha Ukara mkoani Mwanza limekamilika rasmi hii leo.

Akizungumza na TBC Waziri Kamwelwe amesema zoezi hilo lililoendeshwa na Jeshi la Ulinzi la Wananchi wa Tanzania -JWTZ kwa kushirikiana na wataalam wa taasisi mbalimbali limehitimishwa rasmi hii leo.

Amesema kwa sasa wakazi wa eneo hilo watatumia kivuko cha MV Ukara chenye uwezo wa kubeba abiria 70 tu bila mizigo.

Amesema hadi kufikia leo zaidi ya shilingi milioni mia tisa zimepatikana na zoezi la michango litasitishwa ifikapo kesho Septemba 29 saa saba mchana.

Kivuko cha MV Nyerere kilizama Septemba 20 mwaka huu mita 50 kufika kwenye gati.

Wakati kivuko cha MV Nyerere kikiendelea kuvutwa ili kufika mwaloni, kivuko cha MV Ukara ambacho kilikuwa kikifanyiwa matengenezo kimeanza kufanyiwa majaribio ili kutoa huduma ya kusafirisha watu kati ya kisiwa cha Ukara na Bugorola wilayani Ukerewe mkoani Mwanza.

Mwandishi wa TBC aliyeko kisiwani Ukara amesema kivuko hicho chenye uwezo wa kubeba watu 70, kitaanza kufanya kazi pindi wataalam watakapojiridhisha kwamba kiko tayari kutoa huduma.

Kivuko hicho kitatumika wakati huu ambapo serikali inaendelea na mchakato wa kupata mzabuni atakayetengeza kivuko kipya kwa ajili ya wakazi wa maeneo hayo.