Waziri Mkuu Kassim Majaliwa Oktoba Sita mwaka huu anatarajia kuanza ziara ya kikazi ya  siku nne mkoani Kagera.

Akiwa mkoani humo, Waziri Mkuu Majaliwa atatembelea na kukagua miradi ya maendeleo katika sekta mbalimbali zikiwemo zile za kilimo, afya, elimu na viwanda.

Taarifa iliyotolewa na mkuu wa mkoa wa Kagera Brigedia Jenerali Marco Gaguti imewataka wakazi wa mkoa huo kujitokeza kwa wingi kwa ajili ya kumpokea kiongozi huyo.

Wakati wa ziara yake mkoani Kagera, Waziri Mkuu Majaliwa atatembelea wilaya za Bukoba, Kyerwa, Karagwe, Muleba na Biharamulo.

Jumla ya wagonjwa 36  wamefanyiwa upasuaji wa moyo wa kufungua kifua na bila kufungua kifua katika kambi maalum ya matibabu inayofanyika katika Taasisi ya Moyo  Jakaya Kikwete (JKCI).

Upasuaji huo unafanywa na madaktari bingwa wa moyo wa taasisi hiyo kwa kushirikiana na wenzao wa Shirika la Albalsam  Care & Care la nchini Saudi Arabia ambapo wagonjwa waliofanyiwa upasuaji wa kufungua kifua ni kumi na bila kufungua kifua kwa kutumia mtambo wa Cathlab kwa njia ya kutoboa tundu dogo katika  paja ni 26.

Akizungumza na waandishi wa habari jijini Dar es salaam daktari bingwa wa upasuaji wa moyo na mishipa ya damu wa JKCI, -Bashir Nyangasa amesema kuwa wagonjwa waliofanyiwa upasuaji hali zao zinaendelea vizuri na wengine wameshatoka katika chumba cha uangalizi maalum na kurudi wodini kwa ajili ya kufanya mazoezi pamoja na matibabu.

“Tunafanya upasuaji wa kubadilisha valvu kwa wagonjwa ambao  valvu zao hazifanyi kazi vizuri, kubadilisha  mishipa ya moyo inayosafirisha damu kutoka mishipa mikubwa kwenda kwenye mzunguko wa moyo na kuziba matundu kwenye moyo kwa watu waliozaliwa na matundu hayo”, amesema Dkt Nyangasa.

“Katika kambi hii tumemfanyia upasuaji wa kupandikiza mshipa wa damu kutoka kwenye mguu na kuuweka kwenye moyo mgonjwa aliyekuwa na maradhi mawili ya moyo ambayo  ni kuziba kwa mishipa ya damu na mlango mkubwa wa moyo”, ameongeza Dkt Nyangasa.

Kwa upande wake  daktari bingwa wa upasuaji wa moyo na mishipa ya damu kutoka Shirika la Albalsam Care and Care la nchini Saudi Arabia,- Emad Bukhari ameipongeza serikali ya Tanzania kwa kuwekeza  katika vifaa vya kisasa vya matibabu ya moyo.

“Kuwepo kwa mashine hizi za kisasa, wataalam pamoja na huduma nzuri  za kibingwa katika Taasisi hii, kumeifanya  kutambulika kimataifa na  hivyo kuzifanya taasisi zinazotibu magonjwa ya moyo Duniani kuja mahali hapa kutoa huduma kwa wananchi”, amesema Dkt Bukhari.

Kambi hiyo maalum ya matibabu inayofanyika katika Taasisi ya Moyo  ya Jakaya Kikwete, inafanyika kwa pamoja na utoaji wa elimu na ubadilishanaji wa ujuzi wa kazi ambao umewajengea uwezo madaktari, wauguzi pamoja na wataalamu wa mashine za moyo.

Rais John Magufuli kwa nyakati tofauti hii leo amepokea hati za utambulisho za mabalozi wapya watano wanaoziwakilisha nchi zao hapa nchini.

Hafla ya kupokea hati hizo za mabalozi wapya wa Ubelgiji, Norway, Sweden, Palestina na Kuwait imefanyika Ikulu jijini Dar es salaam.

Mara baada ya Rais Magufuli kupokea hati hizo za utambulisho, alifanya mazungumzo na mabalozi hao wapya kwa nyakati tofauti, mazungumzo yalioyohusu masuala ya kiuchumi na kisiasa.

Waziri wa Mambo ya Nje na Ushirikiano wa Afrika Mashariki Balozi Augustine Mahiga ambaye naye ameshuhudia mazungumzo hayo amesema kuwa Rais Magufuli na mabalozi hao wapya wanaoziwakilisha nchi zao hapa nchini wamesisitiza kudumishwa kwa uhusiano na ushirikiano baina ya Tanzania na mataifa hayo.

Serikali imefanikiwa kuokoa zaidi ya shilingi Trilioni 3.2 zikiwemo shilingi Trilioni 2.2 zilizookolewa kutoka kwenye mifuko ya hifadhi ya jamii baada ya kufanya uhakiki wa madeni ya serikali, kuondoa watumishi hewa na wenye vyeti feki.

Katibu Mkuu Wizara ya Fedha na Mipango Doto James amesema timu ya wataalam wanaotengeneza na kusimamia mifumo ya mapato ya serikali, wakaguzi na wataalamu wa bajeti pia imefanikiwa kudhibiti mianya ya upotevu wa fedha za serikali baada ya kuunganisha taasisi 304 katika mfumo unaodhibitiwa na Wizara ya Fedha na Mipango.

Katibu Mkuu huyo amebainisha hayo wakati akiwasilisha taarifa ya uanzishwaji wa mifumo katika taasisi za umma 304 kwa Rais Dkt. John Magufuli Ikulu jijini Dar Es Salaam na kusema fedha hizo zimeokolewa katika kipindi cha mwaka 2016/17 hadi mwaka 2017/18.

Aidha Rais Dkt. John Magufuli amewapongeza wataalamu hao kwa kazi nzuri waliyoifanya na kumuagiza Katibu Mkuu Kiongozi Balozi John Kijazi kuhakikisha taasisi zote za serikali zinazopaswa kuunganishwa na mifumo ya udhibiti zinaunganishwa haraka iwezekanavyo.

Amesema fedha zilizopatikana baada ya udhibiti wa mifumo ya ukusanyaji wa mapato zimesaidia kutekeleza miradi mikubwa ya maendeleo ikiwemo ujenzi wa vituo vya afya 208, ujenzi wa hospitali mpya 67, ujenzi wa reli ya kati kwa kiwango cha kisasa Standard Gauge Railway, madaraja, barabara, kusambaza umeme na maji.

Rais John Magufuli amesema kuwa serikali inatambua kazi kubwa inayofanywa na Chama Cha Skauti nchini ikiwa ni pamoja na kutoa msaada wakati yanapotokea majanga mbalimbali.

Rais Magufuli ametoa kauli hiyo Ikulu jijini Dar es salaam wakati wa hafla ya kumuapisha Katibu Mkuu wa wizara ya Mambo ya Nje na Ushirikikiano wa Afrika Mashariki Dkt Faraji Mnyepe pamoja na Mwantumu Mahiza kuwa Skauti Mkuu wa Tanzania.

Ameongeza kuwa  serikali inatambua changamoto mbalmbali zinazokikabili Chama cha Skauti nchini na kwamba itaendelea kuzishughulikia.

Rais Magufuli ameelezea matumaini yake kwa Chama hicho cha Skauti nchini kuendelea kuwa mstari wa mbele katika kushughulikia masuala mbalimbali chini ya uongozi wa Skauti Mkuu Mwantumu Mahiza.

Kwa upande wa Dkt Mnyepe, Rais Magufuli amemtaka kutekeleza majukumu yake kwa ufanisi ili kuleta mabadililiko ndani ya wizara hiyo ya Mambo ya Nje na Ushirikikiano wa Afrika Mashariki.

Amesema kuwa wizara hiyo inakabiliwa na changamoto nyingi, hivyo ni vema akajipanga vizuri ili kuhakikisha anakabiliana na changamoto hizo.