Tume ya Taifa ya Uchaguzi (NEC) imetangaza tarehe mbili Disemba mwaka huu kuwa siku ya uchaguzi mdogo katika majimbo ya Simanjiro lililopo mkoani Manyara, Serengeti lililopo mkoani Mara na kwenye kata 21 katika maeneo mbalimbali nchini.

Mwenyekiti wa NEC Jaji Semistocles Kaijage amesema kuwa  fomu za uteuzi  wa  wagombea zitatolewa kati ya  Oktoba 28  na Novemba Tatu mwaka huu na kufuatiwa na kampeni za uchaguzi zitakazofanyika kuanzia tarehe Nne Novemba hadi Disemba mosi  mwaka huu.

“Tunapenda kuvikumbusha vyama vya siasa na wadau wote wa uchaguzi kuzingatia sheria, kanuni, maadili ya uchaguzi, taratibu, miongozo na maelekezo yanayotolewa na Tume ya Taifa ya Uchaguzi wakati wa kipindi chote cha uchaguzi huu mdogo,” amesema Jaji Kaijage.

Rais wa Zanzibar na Mwenyekiti wa Baraza la Mapinduzi Dkt Ali Mohamed Shein ametoa wito kwa Watanzania wote kuendelea kumuenzi Baba wa Taifa Hayati Mwalimu Julius Kambarage Nyerere kwa vitendo.

Dkt Shein ametoa wito huo jijini Tanga, wakati wa kumbukumbu ya miaka 19 ya kifo cha Baba wa Taifa, Kilele cha Mbio za Mwenge wa Uhuru pamoja na hitimisho la wiki ya Vijana Kitaifa.

Amesema kuwa Hayati Mwalimu Nyerere alikua anajali na kusisitiza umoja siku zote za maisha yake, hivyo ni vema Watanzania wakaendeleza umoja huo ili Taifa liweze kupata maendeleo kwa haraka.

Kuhusu rushwa, Dkt Shein ametoa wito kwa Watanzania wote bila kujali tofauti zao, kupiga vita vitendo vya rushwa kwa kutoa
taarifa za watu wanaojihusisha na vitendo hivyo ili kumuenzi Baba wa Taifa ambaye aliichukia rushwa.

Kwa upande wa Mwenge wa Uhuru, Rais huyo wa Zanzibar na Mwenyekiti wa Baraza la Mapinduzi amesisitiza kuwa serikali zote mbili zitaendelea kuzienzi na kuzithamini mbio za Mwenge wa Uhuru.

Amewataka wale wote ambao wamekua wakiubeza Mwenge huo wa Uhuru waache mara moja kwa kuwa umekua ukihamasisha uendelezaji wa miradi mbalimbali nchini kote.

Akizungumzia wiki ya vijana Kitaifa, Dkt Shein amesema kuwa imekua na manufaa makubwa kwa kutoa mafunzo ya aina mbalimbali kwa vijana.

Amewataka vijana nchini kufanya kazi kwa bidii kwa kuwa ndio msingi wa maendeleo na kujiepusha na vitendo viovu ikiwa ni pamoja na matumizi ya dawa za kulevya.

Rais John Magufuli na mke wake Mama Janeth Magufuli wameungana na waumini wengine katika Ibada maalum ya kumuombea Baba wa Taifa Hayati Mwalimu Julius Kambarage Nyerere.

Ibada hiyo imefanyika katika Kanisa la Mtakatifu Petro Oysterbay jijini Dar es salaam ikiwa ni miaka 19 tangu kifo cha Baba wa Taifa.

Mara baada ya Ibada hiyo, Rais Magufuli na mke wake Mama Janeth walimtembelea Mjane wa Baba wa Taifa, – Maria Nyerere nyumbani kwake Msasani jijini Dar es salaam.

Mgombea ubunge katika jimbo la Liwale mkoani Lindi kupitia Chama Cha Mapinduzi (CCM) Zuberi Kuchauka ametangazwa kuwa mshindi wa kiti hicho.

Kuchauka ameshinda baada ya kupata kura 34, 532 ambazo ni sawa na asilimia 84.81 ya kura zote zilizopigwa.

Akitangaza matokeo hayo, msimamizi wa uchaguzi wa jimbo la Liwale, -Luiza Mlelwa amempongeza Kuchauka kwa kuaminiwa na Wakazi wa jimbo hilo na hivyo kuamua kumchagua ili aendelee kuwatumikia.

Katika uchaguzi huo mdogo wa ubunge kwenye jimbo la Liwale mkoani Lindi waliojiandikisha kupiga kura ni 55, 777, waliojitokeza kupiga kura ni 40706 na kura halali zilikuwa 40, 301.

Viongozi wa Bara la Afrika  wametakiwa kuhakikisha chaguzi mbalimbali zinazofanyika katika mataifa yao zinafanyika kwa kuzingatia kanuni na sheria.

Wito huo umetolewa jijini Dar es salaam na baadhi ya wasomi na wanasiasa wakati wa mdahalo wa wazi wa kumbukizi ya  miaka 19 ya kifo cha Baba wa Taifa, Hayati Mwalimu Julius Kambarage Nyerere, ambapo miongoni mwa mada zilizojadiliwa ni ile inayohusu mienendo ya chaguzi na mustakabali wa mataifa ya Afrika.

Akifungua mdahalo huo, Mwenyekiti wa Kigoda  cha Mwalimu Nyerere, Profesa Rwekaza Mukandala amesema kuwa nchi nyingi za Bara la  Afrika  zimekuwa zikifanya chaguzi ambazo hazileti tija katika mataifa yao bali kuchochea migogoro ya kisiasa.

Amesema kuwa jambo kubwa ambalo mataifa ya Afrika  yanatakiwa kufahamu ni kuendeleza  yale yaliyoasisiwa na waasisi wa mataifa hayo ambao walikuwa na mwelekeo wa kuimarisha  demokrasia iliyoleta tija ndani ya mataifa yao.

Kwa upande wake Mkurugenzi wa Taasisi ya Mwalimu  Nyerere, -Joseph Butiku  amesema kuwa Watanzania wanatakiwa  kufahamu kuwa amani ni jambo la kuzingatiwa katika kipindi cha uchaguzi ili taifa liendelee kuwa na amani na utulivu.