Katibu Mkuu wa wizara ya Habari, Utamaduni, Sanaa na Michezo Susan Mlawi ameelezea kuridhishwa na hatua iliyofikiwa ya uanzishwaji wa chaneli maalum ya Utalii ya shirika la Utangazaji Tanzania (TBC).

Mlawi ametoa kauli hiyo jijini Dar es salaam wakati wa kikao maalum cha Makatibu wakuu wa sekta zinazohusika na masuala ya utalii na menejimenti ya TBC na kuongeza kuwa chaneli hiyo itazinduliwa mwezi Disemba mwaka huu.

Kwa upande wake Katibu Mkuu wa wizara ya Maliasili na Utalii Profesa Adolf Mkenda amesema kuwa hatua iliyofikiwa ya uanzishwaji wa chaneli hiyo maalum ya utalii ni kubwa na ya kuridhisha.

Kikao hicho kimehudhuriwa pia na Naibu Katibu Mkuu wa wizara ya Habari, Utalii na Mambo ya Kale kutoka Serikali ya Mapinduzi Zanzibar Dkt Salehe Yusuf Mnemo ambaye amewaeleza washiriki wa kikao hicho kuwa suala la utalii ni la kitaifa na likipewa kipaumbe litakua na faida kubwa kwa Taifa.

Naye Mkurugenzi Mkuu wa TBC, – Dkt Ayub Rioba amesema kuwa chaneli hiyo itakayojulikana kama TANZANIA SAFARI itakuwa ni maalum kwa ajili ya kutangaza maliasili, utalii, vivutio na tamaduni zilizopo nchini .

Dkt Rioba ametoa wito kwa Watanzania wote hasa waandishi wa habari, kuandika na kutangaza mambo mazuri ya kimaendeleo ya Taifa ili kuondoa dhana iliyojengeka miongoni mwa baadhi ya raia wa mataifa ya nje kuwa Bara la Afrika linatawaliwa na vita na njaa.

Mwezi Mei mwaka 2017 alipoitembelea TBC, Rais John Magufuli aliliagiza shirika hilo kuanzisha chaneli maalum itakayotangaza mambo mazuri na ya kuvutia yanayopatikana Tanzania, lengo likiwa ni kuongeza idadi ya watalii wanaotembelea nchini kila mwaka.

Mkurugenzi wa manispaa ya Kigamboni mkoani Dar es salaam, -Ng’wilabuzu Ludigiji amesema kuwa kuna umuhimu kwa vituo vya afya nchini kutumia mashine za kielektroniki katika ukusanyaji wa mapato.

Ludigiji amesema kuwa hatua hiyo itasaidia kudhibiti upotevu wa mapato na hivyo kuboresha utoaji wa huduma bora za afya kwa wagonjwa.

Mkurugenzi huyo wa manispaa ya Kigamboni ametoa kauli hiyo wakati akipokea msaada wa vitanda vya kulalia wagonjwa pamoja na vya kujifungulia vitakavyotumiwa na wagonjwa wanaolazwa katika kituo cha afya cha Kigamboni.

Akizungumza wakati wa makabidhiano hayo, Mkurugenzi wa NMB Kanda ya Dar es salaam, – Badru Iddi amesema kuwa benki hiyo ipo tayari kutoa mashine hizo za kielekroniki ili kuvisaidia vituo vya afya katika ukusanyaji mapato.

Tayari serikali imetoa shilingi milioni mia nne kwa ajili ya ujenzi wa wodi ya akina mama katika kituo hicho cha afya cha Kigamboni, ujenzi ambao umefikia hatua ya kuezeka na itakapokamilika itasaidia akina mama wengi zaidi wanaofika katika kituo hicho kwa ajili ya kupatiwa matibabu.

Jeshi la polisi mkoani Mwanza linawashikilia watu watano akiwemo Rahel Matalaka mkazi wa kijiji cha Ikelege wilayani Misungwi kwa tuhuma za kumpiga hadi kusababisha kifo cha mtoto wake Maliatabu Constantine, mwanafunzi wa darasa la pili katika shule ya msingi Ikelege.

Kamanda wa polisi wa mkoa Mwanza, – Jonathan Shanna amesema kuwa Rahel anatuhumiwa kumpiga Maliatabu sehemu mbalimbali za mwili  kwa kutumia fimbo, baada ya kufikishiwa malalamiko kuwa ameiba maembe kwa jirani.

Kamanda Shanna ameongeza kuwa baada ya kusababisha kifo cha mtoto wake, Rahel alimtundika mtoto wake juu ya mwembe kwa kutumia kipande cha kanga ili kupoteza ushahidi.