Rais John Magufuli ametangaza kuwa, serikali itanunua korosho za wakulima wa mikoa ya Lindi na Mtwara kwa shilingi elfu 3, 300 kwa kilo muda wowote kuanzia hivi sasa.
Rais Magufuli ametoa tangazo hilo Ikulu Jijini Dar es salaam wakati wa hafla ya kuwaapisha Mawaziri wawili na Naibu Mawaziri wanne aliowateua hivi karibuni.

Akitoa tangazo hilo, Rais Magufuli amesema kuwa serikali imeachana na kampuni 13 ambazo zimejitokeza hadi asubuhi ya leo kuonyesha nia ya kununua korosho hizo baada ya kutakiwa kufanya hivyo na Waziri Mkuu Kassim Majaliwa.

Rais Magufuli amesema kuwa serikali imefikia uamuzi huo baada ya kubaini kuwa, kampuni hizo hazina nia njema na wakulima wa zao hilo la korosho la lengo lao ni kuendelea kuwanyonya.

Amewataka viongozi hao aliowaapisha hii leo ambao ni pamoja na wa wizara nyeti za Kilimo na Viwanda, Bishara na Uwekezaji kufanya jitihada za kutafuta soko la korosho kwa kuwa kwa sasa jitihada hazijafanyika ipasavyo.

Pia ametumia hafla hiyo kuiagiza wizara inayohusika na Benki ya Maendeleo ya Kilimo kumthibitisha kwenye nafasi ya Ukurugenzi aliyekua akikaimu nafasi hiyo.

Awali Waziri Mkuu Kassim Majaliwa alieleza kuwa hadi kufikia asubuhi ya leo, kampuni 13 zimejitokeza zikithibitisha kuwa zitanunua korosho kwa bei elekezi iliyotolewa na serikali baada ya kuwapatia muda wa siku nne kuthibitisha jambo hilo.

Waziri Mkuu pia amewataka viongozi wote walioapishwa, kujifunza kwa haraka majukumu yao na kutekeleza majukumu hayo kwa uadilifu na nidhamu

Serikali imetoa siku nne kwa wanunuzi wote 35 waliojiandikisha kununua korosho kupeleka barua katika Ofisi ya Waziri Mkuu wakionesha  kiasi cha tani wanazohitaji na lini watazichukua.

Akitoa tamko la serikali kuhusu ununuzi wa zao la korosho mjini Dodoma Waziri Mkuu Kassim Majaliwa amesema wanunuzi waliojiandikisha wakiwemo wale wote ambao wamekuwa wananunua kwenye minada lakini kwa kiasi kidogo, wahakikishe ndani ya siku hizo nne kuanzia leo Ijumaa hadi Jumatatu saa 10 alasiri wanawasilisha barua zao.

Amesema baada ya siku hizo kupita serikali italazimika kufuta usajili kwa wote waliojisajili kununua zao hilo kwa sababu walikubaliana kwenda kununua.

Makamu wa Rais Samia Hassan Suluhu leo anaanza ziara ya siku tano mkoani Kilimanjaro.

Akiwa mkoani humo pamoja na mambo mengine, Makamu wa Rais atatembelea na kukagua miradi mbalimbali ya maendeleo katika halmashauri zote za mkoa huo.

Mkuu wa mkoa wa Kilimanjaro, – Anna Mghwira ametoa wito kwa wakazi wa mkoa huo kujitokeza katika maeneo yote ambayo Makamu wa Rais Samia Suluhu Hassan atayatembelea.

Serikali imewataka wakulima wa zao korosho nchini kuendelea kuwa wavumilivu na watulivu wakati ikiendelea kuzungumza na wanunuzi wakubwa wa korosho kutoka maeneo mbalimbali duniani, lengo likiwa ni kupata soko la uhakika la zao hilo.

Kauli hiyo imetolewa bungeni jijini Dodoma na Waziri Mkuu Kassim Majaliwa wakati wa kipindi cha maswali ya papo kwa papo kwa Waziri Mkuu, ambapo Mbunge wa Mtwara Mjini, -Maftaha Nachuma alitaka kupata kauli ya serikali kuhusu bei ya korosho ambayo imeshuka katika msimu wa mwaka huu na kusababisha wakulima kugomea baadhi ya minada.

“Tunaendelea kuzungumza na wanunuzi wakubwa ili tujue ni nani atanunua korosho na kwa kiasi gani, hivyo tunawaomba wakulima waendelee kuwa watulivu, serikali inajitahidi kuhakikisha zao hilo linatafutiwa masoko, Korosho zitanunuliwa tu,” amesisitiza Waziri Mkuu.

Wakati huohuo, Waziri Mkuu amesema kuwa serikali imeweka mazingira mazuri ya uwekezaji katika sekta mbalimbali nchini ikiwemo ya ujenzi wa viwanda vya mbolea.

Waziri Mkuu Majaliwa ameyasema hayo wakati akijibu swali la mbunge wa viti maalum, Neema Mgaya aliyetaka kujua serikali ina mpango gani katika kuwahamasisha wawekezaji kuja kuwekeza katika viwanda vya mbolea ili wakulima waweze kuipata kwa gharama nafuu.

Ameongeza kuwa viwanda vya mbolea vilivyopo nchini ni vichache na havitoshelezi mahitaji, hivyo kwa sasa kuna utaratibu wa kujenga viwanda vingine viwili, kimoja wilayani Kilwa mkoani Lindi na kingine kitajengwa mkoani Mtwara.

Kuhusu suala la wakulima wa mahindi kukosa soko, amesema kuwa ruhusa ya kuuza mahindi nje ya nchi ilishatolewa na jambo hilo lilikwishatolewa ufafanuzi na Wizara ya Kilimo.

Waziri Mkuu Majaliwa amefafanua kuwa licha ya kuwepo kwa ruhusa hiyo ya kuuza mahindi nje ya nchi, ni lazima serikali itambue kiasi gani kinachotolewa kwa ajili ya kuuza nje ya nchi, hivyo muuzaji anatakiwa awasisilishe taarifa zake kwa wakuu wa wilaya.