Jeshi la Polisi Nchini limejipanga kudhibiti vitendo vya uhalifu katika kipindi hiki cha kuelekea sikukuu za mwisho wa mwaka za Krismasi na Mwaka Mpya na kuwaomba Watanzania wote kushirikiana na Jeshi hilo ili kuwafichua  wahalifu kwenye maeneo mbalimbali.

Kauli hiyo imetolewa na Msemaji wa Jeshi la Polisi Nchini, – Ahmed Msangi alipofanya ziara ya kutembelea ofisi za Shirika la Utangazaji Tanzania (TBC) eneo la Mikocheni jijini Dar es salaam na kuongeza kuwa Jeshi hilo lipo imara katika kukabiliana na vitendo vya uhalifu.

Kwa mujibu wa Kamanda Msangi, kufuatia elimu ya usalama barabarani inayotolewa na Jeshi hilo mara kwa mara,  ajali za barabarani zimepungua kwa kiasi kikubwa kuanzia mwezi Januari hadi Oktoba mwaka huu na kutaka kuzingatiwa kwa sheria za usalama barabarani kipindi hiki cha kuelekea Sikukuu za mwisho wa mwaka .

Ziara hiyo ya Msemaji wa Jeshi la Polisi Nchini katika Shirika la Utangazaji Tanzania, ilikua na lengo la kujitambulisha baada ya kuteuliwa kushika wadhifa huo hivi karibuni.

Chuo Kikuu cha Aga Khan kina mpango wa kuandaa mapendekezo yatakayowasilishwa kwenye mamlaka husika ili kusaidia kupunguza vifo vya mama na mtoto katika maeneo mbalimbali nchini.

Hayo yamebainika jijini Dar es salaam wakati wa mkutano ulioshirikisha wadau mbalimbali wa afya ya uzazi, mkutano uliokua na lengo la kuandaa mapendekezo hayo.

Akizungumza kando ya mkutano huo, Muuguzi Mkuu wa Hospitali ya Aga Khan Dkt Lucy Hwai ameiomba serikali kuhakikisha madaktari bingwa wa masuala ya uzazi wanapelekwa katika maeneo ya vijijini ambako kuna vifo vingi vya mama na mtoto ili kusaidia kupunguza vifo hivyo.

Kwa upande wake Kaimu Mkurugenzi Msaidizi wa afya ya uzazi na mtoto kutoka Wizara ya Afya, Maendeleo ya Jamii, Jinsia na Watoto,  -Makuwami Mohamed amesema kuwa ushirikiano baina ya sekta binafsi na serikali ni muhimu katika kupunguza vifo hivyo vya mama na mtoto.

Rais Dkt. John Magufuli amefanya uteuzi wa viongozi mbalimbali wa taasisi za umma.

Taarifa iliyotolewa na Mkurugenzi wa Mawasiliano ya Rais Ikulu imesema walioteuliwa ni  Pius Msekwa kuwa Mkuu wa Chuo Kikuu cha Sayansi na Teknolojia Mbeya na Zakia Meghji kuwa Mwenyekiti wa Baraza la Chuo hicho.

Halikadhalika Rais Magufuli amemteua Profesa Esnati Chaggu kuwa Mwenyekiti wa Baraza la Taifa la Hifadhi na Usimamizi wa Mazingira –NEMC, Dkt. Samwel Gwamaka kuwa Mkurugenzi Mtendaji wa Baraza la Taifa la Hifadhi na Usimamizi wa Mazingira NEMC.

Wengine walioteuliwa ni Meja Jenerali Mstaafu Michael Isamuhyo kuwa Mwenyekiti wa Bodi ya Shirika la Madini la Taifa –STAMICO, Profesa Gaspar Mhinzi kuwa Mwenyekiti wa Bodi ya Wakurugenzi wa Mamlaka ya Udhibiti wa Mkondo wa Juu wa Petroli – PURA.

Uteuzi wa viongozi hawa umeanza leo tarehe 06 Desemba, 2018.

Rais John Magufuli amekutana na kufanya mazungumzo na Mkurugenzi Mkuu Mstaafu wa Idara ya Usalama wa Taifa Apson Mwang’onda Ikulu jijini Dar es salaam.

Baada ya mazungumzo hayo, Mwang’onda amemshukuru Rais Magufuli kwa kukubali ombi lake la kumuona na kuzungumza nae na amempongeza kwa uongozi mzuri unaochochea kasi ya maendeleo hususani katika utekelezaji wa miradi mikubwa ya maendeleo.

Mwang’onda ameitaja baadhi ya miradi mikubwa ya maendeleo inayotekelezwa chini ya serikali ya Rais Magufuli kuwa ni ule wa uzalishaji wa umeme katika mto Rufiji na ujenzi wa madaraja na barabara ambazo licha ya kurahisisha usafiri zitasaidia kuondoa msongamano wa magari katika jiji la Dar es salaam.

“Mabadiliko ni makubwa sana ambayo yametokea, kuna miradi mikubwa mingi inafanyika sasa hivi, kwa hiyo mabadiliko ni makubwa kusema kweli na yote hayo ni kwa manufaa ya nchi, kwa hiyo nachoweza kusema amefanya kazi kubwa kwa maendeleo ya nchi”, amesema Mkurugenzi Mkuu huyo Mstaafu wa Idara ya Usalama wa Taifa, Apson Mwang’onda.

Ametoa wito kwa Watanzania wote kushirikiana na serikali ili iweze kutekeleza mipango yake kwa ufanisi na kwa manufaa ya Taifa.