Naibu Waziri wa Nishati, – Subira  Mgalu  ameuagiza Wakala wa Nishati Vijijini (REA) na Shirika la Umeme Nchini (TANESCO) kuwa makini katika kupanga vijiji vinavyopaswa kupatiwa huduma ya umeme kwenye wilaya zenye majimbo mawili ya uchaguzi ili kuepusha malalamiko ya kupendelea upande mmoja.

Naibu Waziri Mgalu ametoa agizo hilo wilayani Tunduru mkoani Ruvuma alipokuwa akikagua miradi ya usambazaji umeme vijijini katika wilaya hiyo yenye majimbo mawili ya Tunduru Kusini na Tunduru Kaskazini.

Amelazimika kutoa agizo hilo baada ya kupata malalamiko kutoa kwa baadhi ya wakazi wa wilaya ya Tunduru waliodai kuwa vijiji vingi vya  jimbo la Tunduru Kaskazini ndivyo vimepatiwa huduma ya umeme huku  jimbo la Tunduru Kusini likiwa na vijiji vichache vilivyopatiwa huduma hiyo.

Naibu Waziri huyo wa Nishati, – Subira  Mgalu  ameelekeza kuwa kazi ya upangaji wa vijiji vilivyo katika mpango wa kupatiwa huduma ya umeme kupitia miradi mbalimbali ishirikishe viongozi wa ngazi tofauti ili kuondoa malalamiko.

Kuhusu kazi ya uunganishaji wilaya ya Tunduru  kwenye umeme wa Gridi ya Taifa,  amesema kuwa wilaya hiyo itaanza kupata  umeme huo kuanzia mwezi Machi mwaka 2019 baada ya kuvuta umeme kutoka wilayani Nanyumbu mkoani Mtwara.

Akiwa wilayani Tunduru, Naibu Waziri Mgalu amewasha umeme katika vijiji vya Namiungo, Mchuluka, Kangomba na Daraja Mbili ambapo kaya zaidi ya mia moja zimeunganishwa na huduma hiyo vikiwemo vituo vya afya na shule.

Wakazi wa vijiji mbalimbali vilivyopatiwa huduma ya umeme wilayani Tunduru wameishukuru serikali kwa kuwafikishia  huduma hiyo ambayo imewawezesha kufanya shughuli za kiuchumi pamoja na kupata huduma za matibabu hata nyakati za usiku tofauti na ilivyokuwa awali.

Mwenyekiti wa Chama Cha Mapinduzi (CCM) Taifa Rais John Magufuli amefungua kikao cha Halmashauri Kuu ya CCM, kikao kilichofanyika Ikulu jijini Dar es salaam.

Akizungumza wakati wa kikao hicho Rais Magufuli amewataka wanachama wa CCM na Watanzania wote kujivunia kwa kuwa nchi inasonga mbele kimaendeleo.

Rais Magufuli ameongeza kuwa serikali imejidhatiti kulipa madeni yaliyokuwa yanadaiwa na wafanyakazi wakiwemo walimu.

Kikao hicho cha Halmashauri Kuu ya CCM kimehudhuriwa na wajumbe mbalimbali wa Halmashauri Kuu ya CCM.

Tume ya Taifa ya Uchaguzi (NEC) imetangaza uchaguzi mdogo  katika kata mbili utakaofanyika Januari 19  mwaka 2019, uchaguzi utakaofanyika pamoja na ule wa jimbo la Temeke mkoani Dar es salaam  na kata 46 za Tanzania Bara uliotangazwa hapo awali.

Katika mkutano wake na waandishi wa habari jijini Dar es salaam, Makamu Mwenyekiti wa NEC, Jaji Mbarouk Salim Mbarouk amezitaja kata hizo kuwa ni Mwanahina iliyopo katika halmashauri ya wilaya ya Meatu mkoani Shinyanga  na Kata ya Biturana katika halmashauri ya wilaya ya Kibondo mkoani Kigoma.

Amesema kuwa fomu za uteuzi wa wagombea hao zitatolewa kati ya Disemba 21 na 27 mwaka huu na uteuzi wa wagombea utafanyika Disemba 27 mwaka huu,  huku kampeni za uchaguzi huo mdogo wa udiwani zikipangwa kuanza  Disemba 28 mwaka huu hadi Januari 18 mwaka 2019.

Jaji Mbarouk ametoa wito kwa  vyama vya siasa nchini  kuzingatia sheria, kanuni, maadili ya uchaguzi, taratibu, miongozo na maelekezo yanayotolewa na Tume ya Taifa ya Uchaguzi wakati wa kipindi chote cha uchaguzi huo mdogo wa udiwani.

Serikali kupitia Sekretarieti ya Ajira katika Utumishi wa Umma imepokea jumla ya maombi 594,300 kutoka kwa waombaji wa nafasi za kazi katika Utumishi wa Umma zilizotangazwa kwenye Wizara, Idara, Wakala, Sekretarieti za mikoa, manispaa, halmashauri na Taasisi za umma kuanzia mwezi Novemba  mwaka 2015 hadi hivi sasa.

Akitoa taarifa ya mafanikio ya miaka mitatu ya Sekretarieti hiyo kuanzia mwaka 2015 hadi mwaka huu jijini Dar es salaam, Katibu wa Sektretarieti ya Ajira, – Xavier Daudi amesema kuwa tangu kuingia madarakani kwa serikali ya awamu ya Tano, serikali imetangaza nafasi zilizo wazi 6,554 ambapo jumla ya waombaji Laki Moja na Elfu Arobaini waliitiwa katika usaili.

Xavier ameongeza kuwa hadi kufikia Disemba 15 mwaka huu,  jumla ya nafasi za wazi za kazi 6,099 zilikwishajazwa, huku nafasi 455 zilizotangazwa kati ya mwezi Novemba na Disemba mwaka huu mchakato wake ukiendelea na utakamilika hivi karibuni.

Ameongeza kuwa mbali na mchakato huo, pia wapo watumishi walioajiriwa na serikali kupitia Ofisi ya Rais, Tawala za Mikoa na Serikali za Mitaa (TAMISEMI) katika kada za Afya na Ualimu, ambapo katika kipindi cha miaka mitatu jumla ya watumishi wa kada za afya 24,728 wameajiriwa wakati kwa upande wa kada ya ualimu jumla ya walimu 40,086 waliajiriwa serikalini.

“Idadi hii inaweza kuongezeka katika mwaka huu wa fedha wa  2018/2019 kwa watumishi watakaoajiriwa katika kada za walimu, afya pamoja na watumishi wa vyombo vya Ulinzi na Usalama ambao utaratibu wake wa ajira unataratibiwa na mamlaka husika” amesema Katibu huyo wa Sektretarieti ya Ajira nchini.

Akizungumzia udhibiti wa waombaji wasio na sifa ikiwemo wenye vyeti vya kughushi, Xavier amesema kuwa Serikali  hiyo ya Ajira katika Utumishi wa Umma imeendelea kukagua  nyaraka za waombaji mbalimbali vikiwemo vyeti vyao ili kuhakikisha kuwa wanaoajiriwa ni wale wenye sifa na vyeti vinavyostahili kwa mujibu wa sheria.

Akifafanua zaidi,  Xavier amesema kuwa kati ya mwaka 2015 na 2018,  jumla ya nyaraka za vyeti vya waombaji kazi 18,817 viliwasilishwa kwenye mamlaka zinazohusika na utoaji wa vyeti hivyo kwa ajili ya uhakiki, ambapo vyeti halali vilikuwa 18,112 na vyeti 706 vilibainika kuwa ni vyeti vya kughushi.