Naibu Waziri wa Ujenzi, Uchukuzi na Mawasiliano Mhandisi Atashasta Nditiye ameahidi kuzifanyia kazi changamoto za kutokuwepo kwa mawasiliano ya simu za mkononi katika baadhi ya maeneo Kisiwani Pemba.

Mhandisi Nditiye ametoa ahadi hiyo wakati wa ziara yake ya kukagua hali ya upatikanaji wa mawasiliano ya simu za mkononi kwa wakazi wanaoishi kwenye mkoa wa Kaskazini uliopo kisiwani Pemba.

Wakati wa ziara hiyo Mhandisi Nditiye amebaini kuwa yapo baadhi ya maeneo katika mkoa huo yana usikivu mdogo wa mawasiliano na mengine hayana kabisa.

Katika hatua nyingine Mhandisi Nditiye amekagua vituo viwili kati ya kumi vya Teknolojia ya Habari na Mawasiliano vilivyojengwa na Mfuko wa Mawasiliano kwa Wote -UCSAF katika Visiwa vya Unguja na Pemba.

Rais John Magufuli ametoa wito kwa Watanzania kuendelea kufanya kazi kwa bidii na kujituma ili kujiletea maendeleo na kuacha kusubiri serikali ili iwapelekee maendeleo.

Rais Magufuli ametoa kauli hiyo jijini Dar es salaam wakati wa hafla ya uwekaji wa jiwe la msingi la ujenzi wa daraja  jipya la Selander litakalounganisha eneo la hospitali ya Aga Khan na Coco Beach kupitia baharini.

Amesema kuwa daraja hilo linajengwa kwa fedha za serikali pamoja na mkopo nafuu kutoka Korea Kusini, nchi ambayo raia wake wamekua wakifanya kazi kwa bidii kubwa na kujituma.

Rais Magufuli pia ametumia hafla hiyo kuwataka Watanzania kuendelea kulinda amani ya nchi kwa kwa kuwa bila nchi kuwa na amani miradi yote ya maendeleo haitaweza kutekelezwa.

Amemtaka mkandarasi anayejenga daraja hilo ambaye ni kampuni ya  GSE kutoka Korea Kusini kukamilisha kazi hiyo ndani ya kipindi cha miezi 30 iliyopangwa ama ikiwezekana hata kufupisha muda wa kufanya kazi hiyo.

Ameelezea matumaini yake kuwa kampuni hiyo itafanya kazi kwa ufanisi mkubwa, kutoka na Korea ya Kusini kuwa na Wakandarasi waliobobea kwenye ujenzi wa miundomninu hasa madaraja na barabara.

Kwa upande wake Balozi wa Korea Kusini nchini, –  Cho Tae-Ick amesema kuwa licha ya kuwa ujenzi huo utarahisisha usafiri jijini Dar es salaam pia utaimarisha uhusiano wa Tanzania na nchi hiyo.

Daraja hilo jipya la Selander ambalo ni kubwa kwa urefu nchini, litakapokamilika litakua na uwezo wa kupitisha zaidi ya magari elfu 50 kwa siku na hivyo kupunguza msongamano wa magari katika jiji la Dar es salaam.

Serikali imesema kuwa hadi kufikia  mwishoni mwa mwezi Januari mwaka 2019 itahakikisha tiketi za mabasi yote ya abiria zinakuwa za mfumo wa kielektroniki, lengo likiwa ni kuongeza mapato ya  nchi kupitia usafari wa mabasi.

Kauli hiyo ya serikali imetolewa na Waziri wa Ujenzi,Uchukuzi na Mawasiliano Mhandisi Isack Kamwelwe wakati wa uwekeji wa jiwe la msingi la ujenzi wa daraja  jipya la Selander lenye urefu wa kilometa 1.03 litakalopita baharini kuanzia hospitali ya Aga Khan mpaka Coco Beach jijini Dar es salaam.

“Mapato mengi yamekuwa yakipotea kutokana na tiketi za mabasi hayo kuwa za kawaida,  hivyo baada ya kuanza kutumika kwa tiketi  hizo mpya, mapato  yataongezeka”, amesema Mhandisi Kamwelwe.

Kwa mujibu wa Mhandisi Kamwelwe,  kwa sasa mabasi elfu 49 ya kusafirisha abiria yanatoa huduma hiyo,   na kutokana na idadi yake yataweza kuingizia kiasi kikubwa cha mapato serikali.

Mtendaji Mkuu wa Wakala wa Barabara Nchini – TANROADS, Mhandisi Patrick Mfugale amesema ujenzi wa daraja jipya la Selander wilayani Kinondoni jijini Dar Es Salaam hautaathiri nyumba wala majengo yaliyo katika eneo hilo.

Akizungumza katika hafla ya uwekaji jiwe la msingi mradi wa ujenzi wa daraja hilo jipya Mfugale amewatoa hofu mabalozi na wakazi wengine wa eneo hilo kwa kuwa mradi huo hautakuwa na madhara kwa mali zao.

Rais Dkt. John Magufuli anatarajiwa kuzindua mradi huu.