Baada ya mashindano ya taifa ya mpira wa kikapu kufanyika kwa mafanikio mkoani Simiyu, uongozi wa shirikisho la mpira wa kikapu nchini TBF umeamua kuyapeleka tena mashindano hayo mkoani humo msimu ujao.

Rais wa TBF Phares Magesa amesema maandalizi yaliyofanywa na mkoa huo yameshawishi kuyarudisha mkoani Simiyu mashindano hayo mwakani.

Pia amesema mashindano hayo yamesaidia kuunda kikosi imara cha timu ya taifa ya mpira wa kikapu.

Mashindano ya taifa ya mpira wa kikapu yaliyomalizika Jumapili Desemba 23 kwa timu ya mkoa wa Dar Es Salaam ya mchezo huo (The Dream Team) kutwaa ubingwa wa mashindano hayo baada ya kuinyuka timu ya mkoa wa Mwanza alama 78 kwa 75 kwenye mchezo wa fainali.

Mabingwa wa soka la Tanzania Bara, klabu ya Simba imetinga hatua ya makundi ya michuano ya ligi ya mabingwa barani Afrika baada ya miaka 15 kupita baada ya kuinyuka timu ya Nkana FC ya Zambia mabao matatu kwa moja.

Timu hiyo ya mtaa wa Msimbazi, Kariakoo imetinga hatua ya makundi baada ya kupindua matokeo ya kichapo cha mabao mawili kwa moja kwenye mchezo wa kwanza uliochezwa wiki moja iliyopita nchini Zambia.

Bao la dakika ya 89 la kiungo Clatous Chama limeivusha timu hiyo baada ya mchezo huo kusomeka mabao mawili kwa moja hadi dakika ya 88 na hivyo bao hilo likaufanya mchezo huo usifike kwenye changamoto ya mikwaju ya penati.

Mara ya mwisho klabu ya Simba kutinga hatua ya makundi ilikuwa mwaka 2003 ambao ulikuwa ni miongoni mwa msimu wa mafanikio kwenye anga za kimataifa kwa klabu hiyo.

Simba inaungana na baadhi ya vilabu vingine kama Wydad Casablanca ya Morocco, TP Mazembe ya Jamhuri ya Kidemokrasi ya Congo na Orlando Pirates ya Afrika Kusini zilizotinga hatua hiyo pia.

Timu nyingine zilizotinga hatua hiyo ni Mamelod Sundowns ya Afrika Kusini, Ismailia na Al Ahly za Misri, Lobi Stars ya Nigeria pamoja na bingwa mtetezi Esperance ya Tunisia

Droo ya hatua ya makundi itapangwa ijumaa, desemba 28 mwaka huu ambapo timu 16 zitakazotinga hatua ya makundi zitapangwa kwenye makundi manne yenye timu nne nne.

Michuano ya Kombe la Shirikisho nchini inaendelea leo kwa mchezo mmoja kwenye dimba la Taifa jijini Dar Es Salaam kwa wenyeji Yanga kuvaana na  Banyampala – Tukuyu Stars kutoka jijini Mbeya.

Yanga wanaingia kwenye mchezo huo kwa tahadhari kubwa hasa baada ya timu kadhaa za ligi kuu kutupwa nje ya michuano hiyo na timu za ligi daraja la kwanza lakini pia historia ya Tukuyu Stars ikiwafanya kuwa makini zaidi.

Mpaka sasa timu tano za ligi kuu ambazo ni Ruvu Shooting Stars ya mkoani Pwani, Mwadui FC ya Shinyanga, Tanzania Prisons ya Mbeya, Ndanda FC kutoka Mtwara na Mbao FC ya jijini Mwanza zimeshafungasha virago kwenye michuano hiyo.

Bingwa wa michuano hiyo ataiwakilisha Tanzania kwenye michuano ya Kombe la Shirikisho barani Afrika kwa msimu ujao wa mashindano.

Ligi ya kulipwa ya mpira wa kikapu nchini Marekani ya NBA imeendelea ambapo bingwa mtetezi Golden State Warriors wameendeleza wimbi la ushindi kwa kuinyuka Los Angeles Clippers alama 129 kwa 127 kwenye mchezo uliochezwa kwenye dimba la Oracle mjini Oakland – California.

Nyota wa mchezo huo alikuwa Stephen Curry aliyefunga alama 42 huku Kevin Durant akifunga nyingine 35 na kucheza mipira iliyorudi uwanjani yaani rebounds 12 na kulizamisha jahazi la Clippers lililokuwa likiongozwa na Tobias Harris aliyefunga alama 32 na kucheza rebounds 9.

Wakati Warriors wakitakata makamu bingwa Cleveland Cavaliers wameendelea kupokea kipigo baada ya kunyukwa alama 112 kwa 92 na Chicago bulls.

Huu unakuwa mchezo wa 26 kwa Cavaliers kupoteza katika msimu huu, huku wakiwa wameshinda michezo 8 pekee na kuna wasiwasi kuwa huenda wakashindwa kufuzu kwa hatua ya mtoano yaani play off kama mambo yataendelea kuwaendea kombo.

Huko TD Garden mjini Boston – Massachusetts wenyeji Boston Celtics wameitandika Charlote Hornets alama 119 kwa 103 wakati Washington Wizards wakishindwa kutamba mbele ya Indiana Pecers na kula mweleka wa alama105 kwa 89 huku Orlando Magic wakikiona cha moto mbele ya Miami Heat kwa kutandikwa alama 115 kwa 91.