Rais John Magufuli ameagiza wastaafu wote waliofikia umri wao wa kustaafu kulipwa kulingana na kikotoo kilichotumika katika mifuko yao ya hifadhi ya jamii kabla mifuko hiyo haijaunganishwa kwa kipindi cha mpito hadi mwaka 2023.

Rais Magufuli ameyasema hayo leo jijini Dar Es Salaam kwenye mkutano na viongozi wa vyama vya wafanyakazi nchini na watendaji wa mifuko ya hifadhi ya jamii na viongozi wa serikali ambapo amesema kustaafu ni heshima hivyo wafanyakazi lazima waheshimiwe kutokana na kufanya kazi kwao.

“Nimeamua kuanzia leo wastaafu wote walipwe kwa kikotoo kilichokuwepo cha zamani kwenye mifuko yao na si vinginenvyo na baadae ndio yaletwe mapendekezo mapya ya kikokotoo kilicho bora na si kwa sasa kwa kuwashtukiza wastaafu ambao wamefanya kazi kwa heshima”alisema Rais Magufuli.

Amesema katika kipindi cha mpito ana uhakika  msimamizi wa mifuko pamoja na serikali wataweza kukaa pamoja na kushirikiana kuwa na kikotoo ambacho kitakuwa bora na chenye kuridhisha pande zote.

Rais Magufuli amewataka wafanyakazi wote nchini kufanya kazi kwa bidii na kuhakikisha malengo yanatimia na kusaidia maendeleo hapa nchini.

Rais. Dkt. John Magufuli anakutana na viongozi wa Shirikisho la Vyama vya Wafanyakazi –TUCTA, vyama shiriki, watendaji wakuu wa Mifuko ya Hifadhi ya Jamii –PSSSF na NSSF na Mamlaka ya Usimamizi wa Hifadhi ya Jamii –SSRA, kujadili masuala yahusuyo mafao ya wafanyakazi hususani Kikokotoo.

Mkutano huo utafanyika Ikulu Jijini Dar es Salaam ambapo Mawaziri na Makatibu Wakuu wa Wizara husika watashiriki.

Mazungumzo ya Rais Magufuli na viongozi hao yatarushwa moja kwa moja yaani Live   na vyombo vya habari vya Redio, Televisheni, www.ikulu.go.tz, youtube ya ikulumawasiliano na mitandao ya kijamii muda wowote kunzia sasa

Mamlaka ya Usafiri wa Anga Nchini – TCAA imesema inashughulikia maombi ya kampuni ya ndege ya Fastjet kuingiza ndege nchini kwakuwa lengo la mamlaka hiyo ni kuhakikisha huduma za usafiri wa anga zinakuwa salama kwa wateja wake.

Akizungumza na waandishi wa habari jijini Dar Es Salaam Mkurugenzi Mkuu wa TCAA, Hamza Johari amesema Mamlaka hiyo haijazuia Fastjet kuingiza ndege mpya kwa ajili ya kuendelea na biashara nchini.

Johari amesema mamlaka hiyo inapenda kuona huduma ya usafiri wa anga inakuwa na ushindani na kutoa huduma zenye uhakika na usalama kwa wateja wake.

Kwa upande wake Mkurugenzi wa Taasisi za sekta binafsi Godfrey Simbeye amezishauri taasisi binafsi kuzingatia sheria katika uendeshaji wa shughuli zao.

Mkuu wa mkoa wa Morogoro  Dkt. Kebwe  Stephen  ameagiza kuitishwa kwa baraza la dharura la Halmashauri ya wilaya ya Ulanga kujadili taarifa ya Tume iliyoundwa na Wizara ya Tawala za Mikoa na Serikali za Mitaa -TAMISEMI kuchunguza tuhuma za  ubadhirifu wa shilingi Bilioni 2.9 zinazodaiwa kutumika kinyume na utaratibu.

Katika mkutano wake na waandishi wa habari mjini Morogoro, Dkt. Kebwe pia ameagiza aliyekuwa  mhasibu  mkuu wa halmashauri hiyo Rajabu Siriwa ambaye amehamishiwa wilayani Gairo kurejea  mara moja wilayani Ulanga ili kujibu tuhuma hizo.

Mkuu huyo wa mkoa wa Morogoro ametoa wito kwa watumishi wa umma kuhusu matumizi ya fedha za serikali huku akimuelekeza Katibu Tawala wa mkoa huo kufuatilia utekelezwaji wa maagizo ya Tume hiyo.

Kwa upande wake Katibu Tawala Msaidizi anaeshughulikia serikali za mitaa Noel Kazimoto amesema hatua kali zitachukuliwa kwa watakaobainika na makosa hayo.

Mkuu wa mkoa wa Mtwara Gelasius Byakanwa amesema haridhishwi na utendaji kazi wa Wakala wa Barabara Vijijini na Mijini – TARURA – mkoani humo ambao amewatuhumu kufanya kazi kwa kukurupuka bila ofisi yake kupewa taarifa.

Byakanwa ametoa kauli hiyo alipokuwa anazungumza kwenye kikao cha Bodi ya Barabara na kusema amelazimika kuunda Tume kuchunguza barabara zote za wilaya ya Mtwara ambazo hazipitiki na kuleta adha kwa wananchi.

Ubovu wa baadhi ya barabara katika manispaa ya Mtwara Mikindani na Halmashauri ya mji wa Nanyamba wilaya ya Mtwara umekuwa ukilalamikiwa na wakazi wa maeneo hayo mara kwa mara.

Baadhi ya wadau wa kikao hicho wameomba TARURA kushirikisha ofisi za Halmashauri kazi wanazofanya ili kuondoa mkanganyiko.

Wakazi wa Kijiji cha Dett Kata ya Nyaburogo Wilayani Rorya Mkoani Mara wameiomba serikali pamoja na wadau wa maendeleo kuunga mkono jitihada zao ili kufanikisha ujenzi wa zahanati ya kijiji hicho.

Wakazi hao wametoa ombi hilo kufuatia kukwama kwa ujenzi wa zahanati yao kwenye hatua ya kuezeka  ambapo Mbunge wa Rorya Lameck Airo amewataka wasikate tamaa na badala yake waendelee kuchangia ujenzi huo ili kusogeza huduma za afya karibu.

Hadi kufikia sasa ujenzi huo shilingi milioni 15 ambayo ni michango ya wananchi.

Kwa upande wake Mbunge wa Rorya ameendesha harambee ya ujenzi huo na kufikisha kiasi cha shilingi milioni 12.