Serikali ya Gabon imesema imerejesha hali ya utulivu nchini humo, baada ya kikundi cha askari waasi kufanya jaribio la mapinduzi, katika kipindi hiki ambapo Rais wa nchi hiyo Ali Bongo yuko nchini Morocco kwa matibabu.

Msemaji wa serikali ya Gabon amesema watu wanne wanaotuhumiwa kufanya jaribio hilo wamekamatwa.

Mapema leo baadhi ya askari walidai kufanya jaribio la mapinduzi nchini Gabon kwa lengo la kurejesha demokrasia nchini humo ambapo magari yenye silaha yalionekana katika mitaa ya mji mkuu wa Gabon, Libreville.

Serikali ya Brazil imepeleka askari wake katika mji wa Fortaleza ulikoko kaskazini mwa nchi hiyo kurejesha hali ya utulivu baada ya vitendo vya uhalifu kuongezeka kwenye mji huo katika siku za hivi karibuni.

Matukio yapatayo themanini yameripotiwa katika jimbo la Sariya katika eneo hilo, ikiwa ni pamoja na vitendo vya ujambazi, unyang’anyi wa kutumia nguvu na mashambulio dhidi ya watu kwa kutumia kemikali zenye athari kwa maisha ya binadamu.

Magenge ya wafanyabiashara haramu wa dawa za kulevya yamekuwa yakihusika na matukio hayo ya uhalifu kuanzia kwenye magereza ya nchi hiyo hadi mitaani.

Serikali mpya iliyoingia madarakani, iliahidi kuwachukulia hatua kali watu wote wanaohusika na biashara haramu ya dawa za kulevya.

Mjumbe maalum wa umoja wa mataifa nchini Yemen, amerejea nchini humo kujaribu kuzisihi pande zinazohusika na mapigano nchini Yemen kutekeleza mkataba wa kusimamisha mapigano zilizotiliana saini nchini Sweden.

Kila upande nchini Yemen unaohusika na mapigano ya nchi hiyo, umekuwa ukuishutumu upande mwingine kuwa chanzo cha kukiuka mkataba wa amani ya kusimamisha mapigano nchini humo.

Wananchi ya Yemen wanataka uwanja wa ndege wa Sanaa ambao kwa sasa umefungwa kutokana na mapigano ufunguliwe.

Baadhi ya wananchi wa Yemen ambao ni wagonjwa na wanahitaji matibabu ya haraka nje ya nchi wanasema, wanashindwa kusafiri, kwenda kupata matibabu nje ya nchi kwa vile uwanja huo wa ndege bado umefungwa.

Upande wa upinzani katika Jamhuri ya Kidemokrasi ya Congo -Drc-umekuwa ukihoji ni kwa nini matokeo ya uchaguzi mkuu wa nchi hiyo yanaendelea kuchelewa kutangazwa.

Matokeo ya uchaguzi katika Jamhuri ya kidemokrasi ya Congo yalikuwa yatangazwa Decemba 6, lakini tume ya uchaguzi ya nchi hiyo imesema huenda matokeo hayo yakatangazwa wiki ijayo.

Hadi sasa nusu ya kura zote zilizopigwa wakati wa uchaguzi mkuu wa nchi hiyo tayari zimehesabiwa.

Upande wa upinzani huko Drc- una wasiwasi kuwa serikali ya nchi hiyo inapanga udanganyifu wa matokeo ya uchaguzi ndio maana matokeo hayo yamekuwa yakichelewa kutangazwa.

serikali ya Drc imekanusha tuhuma hizo za upinzani na kusema kuwa nchi hiyo ni kubwa na baadhi ya maeneo yako pembezoni, hiyo zoezi la kukusanya matokeo halikuwa rahisi.

hata hivyo katika baadhi ya maeneo wapinzani wameshindwa kuonyesha uvumilivu na kushiriki katika maandamano ya kupinga kuchelewa kwa matokeo ya uchaguzi wa rais, hali iliyosababisha vyombo vya usalama kutumia nguvu kutawanya maandamano hayo.

Askari polisi mmoja amekufa mjini Cairo nchini Misri alipokuwa akijaribu kutegua bomu lililokuwa limetegwa karibu na kanisa moja kwenye mji huo.

Askari wengine wawili waliokuwa wakisaidia na askari polisi huyo kutegua bomu hilo wamejeruhiwa, baada ya kushindwa kuliwahi bomu hilo na kisha kulipuka.

Bomu hilo lilikuwa limetegwa siku mbili kabla ya wakristo wa madhehebu ya Coptic nchini humo kusherehekea sikukuu ya Krismas.

Mara kadhaa yametokea mashambulio katika makanisa ya kikristo nchini Misri na kusababisha maafa na hivi sasa Serikali ya nchi hiyo inaendelea kuimarisha ulinzi ili kudhibiti milipuko kama hiyo inayolenga mikusanyiko ya watu.