Kaimu Mtendaji Mkuu wa Wakala wa Taifa wa Hifadhi ya Chakula Nchini -NFRA, Vumilia Zikankuba amesema kamwe hatanunua mahindi ya wakulima yasiyo na ubora.

Zikankuba ametoa kauli hiyo mbele ya Katibu Mkuu Wizara ya Kilimo Mathew Mtigumwe ambaye amekutana na wakulima wa Mkoa wa Katavi ambao  wanalalamika kuwa mahindi yao hayajanunuliwa kutokana na kukosa ubora.

Jumla ya Tani 2500 za mahindi za wakulima zimeshindwa kununuliwa kutokana na madai ya mahindi yao kukosa ubora unaotakiwa na Wakala wa Taifa wa Hifadhi ya Chakula nchini.

Jumla ya wagonjwa 45 wanatarajiwa kufanyiwa upasuaji wa moyo wa bila kufungua  kifua katika kambi maalum ya matibabu ya moyo kuanzia Tarehe 7 hadi 18 mwezi huu katika Taasisi ya Moyo Jakaya Kikwete       -JKCI.

Taarifa iliyotolewa na Kitengo cha Uhusiano cha Taasisi ya Moyo ya Jakaya Kikwete imesema kuwa upasuaji huo unafanywa  kupitia madaktari bingwa wa magonjwa ya moyo kwa kushirikiana na Madaktari Afrika na Shirika la Cardio Start wote kutoka nchini Marekani.

Matibabu yanayofanyika  katika kambi hiyo ni upasuaji wa kufungua kifua bila kufungua kifua ambao unafanyika kupitia tundu dogo kwenye paja kwa wagonjwa kuzibuliwa mishipa ya moyo iliyoziba yaani                  -Percutaneous Coronary Intervention na kuwekewa vifaa  vinavyosaidia kurekebisha mapigo ya moyo ambavyo ni Permanent Pacemaker na High Powered Devices.

Wagonjwa watakaofanyiwa upasuaji ni wale wenye matatizo ya moyo ambayo ni valve, mishipa ya moyo iliyoziba, moyo kushindwa kufanya kazi vizuri, matibabu kwa watu wazima waliozaliwa na matatizo ya moyo na wale wenye matatizo ya moyo yaliyotokana  na ugonjwa wa Kisukari.

Kambi hii inaenda  sambamba na utoaji wa elimu kwa madaktari na wauguzi pamoja na kubadilishana ujuzi wa kazi kwa wageni na wataalamu kutoka nchini Marekani.

Hii ni kambi ya kwanza ya matibabu ya moyo tangu kuanza kwa mwaka huu wa 2019 na ni mara ya kwanza kwa Shirika Cardio Start  kuja hapa nchini.

Jeshi la Polisi Mkoani Iringa linawashikilia watu watatu kwa tuhuma za kuhusika katika matukio ya ujangili wa tembo katika Hifadhi ya Taifa ya Ruaha Mkoani Iringa.

Kamanda wa Polisi wa mkoa huo, Juma Bwire amesema watuhumiwa hao wamekamatwa kufuatia taarifa za wasamaria wema ambapo wamekutwa na bunduki mbili aina ya gobore zinazosadikiwa kutumika kwenye uwindaji huo haramu.

Kukamatwa kwa watuhumiwa watatu wa ujangili kumekuja siku chache baada ya kuripotiwa kurejea tena kwa kasi vitendo vya ujangili wa tembo katika Hifadhi ya Ruaha ambavyo vilikuwa vimepungua kwa kiasi kikubwa.

Katika kipindi cha mwaka jana inakadiriwa kuwa tembo sita walikutwa wameuawa kwenye eneo la nje ya Hifadhi ya Ruaha hali iliyoashiria kuwa wawindaji haramu wameanza tena ujangili wa tembo.

Katika hatua nyingine, Jeshi la Polisi Mkoani Iringa limewatia mabaroni watuhumiwa watano akiwemo dereva wa lori la kusafirisha mafuta kwa wizi wa Lita Elfu 38 za mafuta ya Dizeli yaliyokuwa yanasafirishwa kwenda nchini Zambia.

Baadhi ya wakazi wa mtaa wa Makanyagio Manispaa ya Mpanda Mkoani Katavi wameuomba uongozi wa Mkoa huo kuingilia kati ujenzi wa miundombinu ya barabara inayodaiwa kujengwa chini ya kiwango.

Akizungumza na Tbc, Mwenyekiti wa Serikali ya mtaa wa Makanyagio, Simon Misonge amesema hali ya mtaa huo si nzuri kwa sasa kutokana na barabara kuzunguka mtaa huo kusombwa na maji ya mvua zinazoendelea kunyesha kutokana na kukosekana kwa mitaro madhubuti ya kuhimili maji.

Kila kona ya Mtaa wa Makanyagio umezungukwa na miundombinu ya barabara  na mitaro ambayo ni kero kwa wananchi.

Kwa upande wake katibu wa Siasa na Uenezi wa Chama cha Mapinduzi Mkoa wa Katavi, Jackson Lema ameelekeza lawama kwa wakala wa barabara vijijini na mjini -Tarura na kuitaka kujitathimini katika kipindi hiki cha mvua ambacho barabara nyingi Mkoani Katavi hazipitiki.

Rais Dkt. John Magufuli amefanya mabadiliko madogo katika baraza la mawaziri, kuteua makatibu wakuu, Naibu Katibu Mkuu, Balozi na Katibu Tawala wa mkoa.

Akitangaza mabadiliko hayo Ikulu jijini Dar Es Salaam Katibu Mkuu Kiongozi Dkt. John Kijazi amesema walioteuliwa ni pamoja na Angela Kairuki ambaye amekuwa Waziri wa Nchi Ofisi ya Waziri Mkuu Uwekezaji, Doto Biteko amekuwa Waziri wa Madini ambapo Stanslous Nyongo anaendelea kuwa Naibu Waziri wa Madini.

Katika uteuzi huo Rais Magufuli amemteua Joseph Nyamuhanga kuwa Katibu Mkuu –TAMISEMI kuchukua nafasi ya Musa Iyombe aliyestaafu kwa mujibu wa sheria.

Zainab Chaula anakuwa Katibu Mkuu Wizara ya Afya, Maendeleo ya Jamii, Jinsia, Wazee na Watoto kuchukua nafasi ya Dkt. Mpoki Ulisubisya aliyeteuliwa kuwa Balozi. Dkt. Ulisubisya atapangia baadae kituo cha kazi.Dorothy Mwaluko ameteuliwa kuwa Katibu Mkuu Ofisi ya Waziri Mkuu Sera na Uwekezaji,Elius  Mwakalinga anakuwa Katibu Mkuu Wizara ya Ujenzi.

Kwa upande wa Naibu Katibu wakuu walioteuliwa ni pamoja na Dorothy Gwajima anayekwenda TAMISEMI, Dkt. Francis Michael anayekuwa Naibu Katibu Mkuu Utumishi na nafasi ya Naibu Katibu Mkuu Ulinzi ikiwa imefutwa rasmi.

Aidha Profesa Faustine Kamuzora ameteuliwa kuwa Katibu Tawala wa mkoa wa Kagera.