Mkuu wa Mkoa wa Mwanza, John Mongela amesema ujio wa Ndege aina ya Airbus 220-300 ya Shirika la Ndege nchini -Atcl utaongeza mnyonyoro wa thamani wa bidhaa zinazozalishwa katika sekta mbalimbali hapa nchini.

Mongela ameyasema hayo Jijini Mwamza wakati ndege hiyo ilipoanza safari zake rasmi hapa nchini kwa kusafiri kutoka Dar es salaam kwenda Mwanza na kusema kuwa ndege hiyo itachochea uchumi na ajira kwa watanzania.
 

Kwa upande wake Naibu Waziri wa Ardhi Nyumba na Maendeleo ya Makazi Angelina Mabula amesema miundombinu ndio njia kuu katika kuutangaza utalii na kukuza uchumi wa nchi.

Naye Mkuu wa Kitengo cha Mahusiano na Mawasiliano Atcl, Josephat Kangirwa amesema kuwa ndege hiyo pia itafanya safari za kwenda India, China na Thailand.

Rais John Magufuli amewataka watendaji serikalini kuacha kufanya ofisi za umma kama mali zao binafsi bali ziwe mali ya watanzania na kulitumikia taifa kwa ujumla.

Rais Magufuli ametoa kauli hiyo Ikulu jijini Dar Es Salaam baada ya kuwaapisha viongozi aliowateua Januari 8 ambapo amesema siku za karibuni umezuka mtindo kwa watendaji wa serikali kufanya ofisi za umma kama za kwao na kuwataka kuacha mara moja tabia hiyo.

Amewataka watendaji kutumikia wananchi kwa haki na kufuata sheria za nchi kwa kufanya maamuzi yenye tija na si kumuonea mtu.

“Naomba watendaji wote msichukue  ofisi za umma kama mali zenu, bali ziwe mali kwa watanzania na mkafanye majukumu kwa ajili ya nchi”alisema Rais Magufuli.

Rais amewataka kufanya kazi kwa weledi na wasiogope kufanya maamuzi pale inapotakiwa lakini isiwe kwa ubinfasi.

Janauri 8 Rais Magufuli alifanya teuzi za viongozi mbalimbali huku akifanya mabadiliko madogo katika baraza la mawaziri, kuteua Makatibu wakuu, Naibu Katibu Wakuu, Balozi na Katibu Tawala.

Rais Dkt. John Magufuli ameitaka Wizara ya Madini kuanzisha vituo vya ukaguzi wa madini ili kuhakikisha Tanzania inakuwa na rekodi ya idadi ya madini yaliyouzwa na kudhibiti mapato yatokanayo na madini.

Hayo ameyasema leo Ikulu jijini Dar Es Salaam baada ya kuwaapisha viongozi mbali mbali aliowateua Januari 8 ambao ni Mawaziri, Makatibu Wakuu, Manaibu Katibu Wakuu, Balozi na Katibu Tawala.

Amesema kuwepo kwa vituo hivyo kutasaidia nchi kufahamu kiwango cha madini kinachouzwa nje na ndani ya nchi na kusaidia kutopoteza rekodi ya madini.

“Wizara ya Madini hakikisheni mnaanzisha vituo hivyo vya madini kwani kwa kutokuwepo kwake kunachangia taifa kupoteza fedha nyingi kwa kutojua kiasi gani cha madini kimepatikana na kuuzwa”alisema Rais Magufuli.

Wizara inapaswa kuhakikisha inafanya uchunguzi wa kina kuhusu soko kubwa la dhahabu kwani Tanzania inaonekana kutofaidika na biashara hiyo.

Amesema sheria ya madini iko wazi namna ya kuingia mikataba na watu wakubwa na wafanyabiashara hivyo ametoa wito kwa Wizara ya Madini kuhakikisha inaweka mambo sawa.

Rais Magufuli amelipongeza Jeshi la Polisi kupitia Inspekta Jenerali wa Polisi Simon Sirro kwa juhudi za kukamata dhahabu hivi karibuni mkoani Mwanza.

Amesema juhudi za  askari waaminifu ambao walifanikiwa kuwakamata wenzao nane waliokuwa katika nia ya kutorosha madini hayo zimeonyesha kuwa bado jeshi la polisi lina askari waaminifu na wenye uchungu na nchi yao.

Pia Rais amemtaka waziri mpya wa Madini Doto Biteko kuhakikisha anashughulikia masuala muhimu ili kuhakikisha nchi haipotezi mapato kupitia sekta hiyo ya madini.

Ameitaka Benki Kuu ya Tanzania -BOT kuanzisha utaratibu wa kununua dhahabu na kuhifadhi dhahabu hiyo ili isaidie nchi katika pato la taifa.

Kwa viongozi aliowaapisha, Rais Magufuli amewataka kwenda kufanya  kazi kwa bidii na kuacha ubinafsi utakaosababisha kuzorota kwa maendeleo ya taifa.