Ethiopia  na Somalia  zimekubaliana kuunganisha nguvu ili kupambana na wanamgambo wa Al Shabaab wa nchini Somalia ambao wameendelea kuhatarisha usalama wa nchi hizo na nchi nyingine jirani.

Mataifa hayo yamefikia makubaliano hayo baada ya wanamgambo hao kufanya shambulio katika kambi moja ya kijeshi nchini Somalia na kusababisha vifo vya askari kadhaa, kabla ya kushambuliwa na vikosi vya Marekani.

Wanamgambo hao wa Al Shabaab,  wiki iliyopita walifanya mashambulio nchini Kenya na kusababisha vifo vya watu 21 na wengine kadhaa kujeruhiwa.

Habari zaidi kutoka nchini Kenya zinasema kuwa watuhumiwa watano katika shambulio hilo ambalo ni la kigaidi  wamefikishwa mahakamani na kusomewa mashtaka ya kuhusika na ugaidi.

Raia wa Kenya wameendelea kuwa na wasiwasi baada ya kubainika kuwa magaidi wanne kati ya watano waliohusika na shambulio hilo lililotokea mjini Nairobi ni raia wa nchi hiyo.

Nchi mbalimbali za Afrika pamoja na Jumuiya za Kimataifa zimeendelea kumtambua Felix Tshisekedi kuwa ndiye rais ajaye wa Jamhuri ya Kidemokrasi ya Kongo baada ya mahakama ya katiba ya Jamhuri hiyo  kuidhinisha ushindi wake.

Mahakama hiyo ya katiba imefikia uamuzi huo na kutupilia mbali madai ya mpinzani mkuu wa Tshisekedi katika uchaguzi wa rais uliofanyika Disemba 30 mwaka 2018  Martin Fayulu,  aliyesema kuwa ndiye mshindi.

Miongoni mwa nchi za Afrika zilizotangaza kumtambua Tshisekedi ni Kenya na Jumuiya ya Maendeleo ya Nchi za Kusini mwa Afrika (SADC), ambao kwa pamoja wamempongeza Tshisekedi kwa ushindi huo  na kutoa wito wa kufanyika kwa  makabidhiano ya amani ya madaraka.

Disemba 30 mwaka 2018, Fayulu aliwasilisha ombi katika mahakama hiyo ya katiba akidai kuwa kulikua na vitendo vya ukiukwaji wa taratibu wakati wa uchaguzi huo na kwamba Tshisekedi amefanya makubaliano ya kugawana mamlaka na Rais wa sasa wa Jamhuri ya Kidemokrasi ya Kongo Joseph Kabila, madai yaliyokanushwa na Rais huyo mteule.

Fayulu ambaye alishika nafasi ya pili katika matokeo ya uchaguzi huo wa rais,  ameendelea kupinga matokeo hayo na kuitaka Jumuiya ya Kimataifa kutomtambua Tshisekedi na ameitisha maandamano ya nchi nzima kwa lengo la kupinga matokeo hayo.

Rais huyo mteule wa Jamhuri ya Kidemokrasi ya Kongo mwenye umri wa miaka 55, ataapishwa Jumanne Januari 22 mwaka huu ili kushika rasmi wadhifa huo wa urais.

Watu 21 wamekufa na wengine 68 wamejeruhiwa kutokana na mlipuko wa bomu lilitegwa ndani ya gari nje ya chuo cha polisi nchini Colombia.

Polisi nchini humo wamesema bomu hilo lilitegwa katika gari hilo lililengwa kwa polisi waliopo katika chuo hicho cha polisi kilichopo mjini Bogota lakini raia wengi waliopo nje ndio waliouwawa pamoja na washambuliaji.

Serikali ya nchi hiyo imetangaza siku tatu za maombolezo  huku waziri wa ulinzi wa nchi hiyo akisema tukio hilo ni la kigaidi.

Ulinzi mkali umeimarishwa katika maeneo hayo ya chuo ambapo pia rais wa nchi hiyo Ivan Duque ameamrisha kuimarisha mipaka yote ya Colombia , ndani na nje ya mji.

Umoja wa Afrika AU umeomba kusitishwa kutangazwa matokeo ya mwisho ya uchaguzi wa urais ambayo yanaendelea kuibua maswali mengi nje na ndani ya Jamhuri ya Kidemokrasia ya Congo.

Rais wa Umoja huo Paul kagame amekutana na viongozi wa Jumuiya ya Maendeleo ya Nchi za Kusini mwa Afrika (Sadc) na Nchi za Kanda ya Maziwa Makuu (Icglr) katika mkutano wa faragha ulodumu takriban saa tano.

Katika taarifa yao ya mwisho ya mkutano huo wameomba mamlaka nchini Drc kusitisha mpango wa kutangaza matokeo ya mwisho ya uchaguzi wa urais baada ya kubaini kuna mashaka makubwa katika matokeo ya awali ya uchaguzi wa urais na ule wa wabunge na magavana wa mikoa yaliyotangazwa na Tume ya Uchaguzi (Ceni).

Viongozi hao wamesema wanatarajia kutuma  ujumbe wa ngazi ya juu mjini Kinshasa kukutana na mamlaka husika.

Ujumbe huo utaundwa na rais wa sasa Umoja wa Afrika Paul Kagame, Mwenyekiti wa sasa wa Tume ya Umoja wa Afrika, Moussa Faki Mahamat, na viongozi wengine ambao walihudhuria mkutano huo.

Mahakama ya Katiba inatarajia kutangaza baadae leo matokeo ya mwisho ya uchaguzi wa urais wa Desemba 30, 2019.