Waziri Mkuu Kassim Majaliwa amesema kuwa serikali inaendelea kushirikiana na Idara ya Mahakama nchini ili kuhakikisha huduma za kisheria zinawafikia wananchi.

Waziri Mkuu Majaliwa ametoa kauli hiyo jijini Dodoma wakati wa ufunguzi wa Wiki ya Sheria, wiki ambayo inafanyika kwa mara ya kwanza jijini humo baada ya serikali kuhamishia Makao Makuu yake.

Amesema kuwa serikali inafuatilia kwa karibu na kuzitatua changamoto zote zinazoikabili Idara ya Mahakama nchini, lengo likiwa ni kuhakikisha Wananchi wengi zaidi wananufaika na huduma za kisheria.

Kwa mujibu wa Waziri Mkuu Majaliwa, Wiki ya Sheria ni muhimu katika kuimarisha mfumo wa utoaji haki nchini, hivyo ni vema ikatumika vizuri ili kufanikisha lengo la Idara ya Mahakama nchini la kumpatia haki kila mwananchi bila ubaguzi.

Ametoa wito kwa wataalamu wa masuala ya sheria nchini kutenga muda wao wa kuwasaidia Wananchi  kufahamu masuala ya kisheria kwa kuwa wengi wao wamekuwa na uelewa mdogo wa masuala hayo, jambo linalochangia baadhi yao kukosa ama kupoteza haki zao. 

Kwa upande wake, Jaji Mkuu wa Tanzania Profesa Ibrahimu Juma   amesema kuwa kwa kipindi cha wiki nzima, maonesho ya Wiki ya Sheria yatafanyika jijini Dodoma  na kwenye Mahakama zote kuanzia ngazi ya wilaya.

Amesema kuwa kupitia maonesho hayo, wananchi wengi watapata fursa ya kutembelea mabanda mbalimbali na kupata elimu kuhusu masuala ya sheria.

Kila mwaka, Idara ya Mahakama nchini imekuwa ikiadhimisha Wiki ya Sheria ambayo pamoja na mambo mengine hutoa fursa kwa Wananchi kupata elimu kuhusu masuala ya sheria.

Mkuu wa Jeshi la Polisi nchini Simon Sirro amefanya mabadiliko ya Makamanda wa polisi wa mkoa wa Mwanza na mkoa wa Kipolisi wa Kinondoni.

Taarifa iliyotolewa  jijini Dar es salaam kwa vyombo vya habari na Kitengo cha Uhusiano, Makao Makuu ya Jeshi la Polisi nchini inaonyesha kuwa Makamanda walioguswa na mabadiliko hayo ni Mussa Taibu anayekwenda kuwa Kamanda wa Polisi wa mkoa wa Kipolisi wa Kinondoni.

Naye Muliro Jumanne aliyekua Kamanda wa polisi wa mkoa wa Kipolisi wa Kinondoni  anakwenda kuwa Kamanda wa Polisi wa mkoa wa Mwanza  na aliyekua Kamanda wa Polisi wa mkoa wa Mwanza, -Jonathan Shana amehamishiwa Makao Makuu ya Jeshi la Polisi Nchini.

Kwa mujibu wa taarifa hiyo ya Kitengo cha Uhusiano Makao Makuu ya Jeshi la Polisi Nchini, mabadiliko hayo ni ya kawaida ya kiutendaji kwa Jeshi la Polisi.

Mwenyekiti wa Chama Cha Mapinduzi (CCM) Taifa Rais John Magufuli amefanya ziara fupi ya kutemblea ofisi za kampuni ya African Media Group inayomiliki vituo vinne vya Televisheni na viwili vya Redio.

Akizungumza na Menejimenti pamoja na Wafanyakazi wa kampuni hiyo jijini Dar es salaam ikiwa ni sehemu ya sherehe za miaka 42 ya kuzaliwa kwa Chama Cha Mapinduzi, Rais Magufuli amewapongeza wafanyakazi hao kwa utendaji kazi wao mzuri na kuwataka kufanya kazi kibiashara.

Rais Magufuli ameahidi kutatua changamoto mbalimbali zinazoikabili kampuni hiyo ikiwemo ile ya uchakavu wa vifaa na majengo na kuahidi kununua vifaa vipya ili kuviwezesha vyombo vya habari vinavyomilikiwa na kampuni hiyo ya African Media Group kuonekana nchi nzima.

Kuhusu ubovu na ufinyu wa jengo linalotumika hivi sasa, Rais Magufuli ameiagiza Menejimenti ya kampuni  hiyo pamoja na wafanyakazi kushirikiana ili kutafuta jengo katika sehemu watakayohitaji ili liweze kuandaliwa kama ofisi.

Akiwa katika ofisi hizo Rais Magufuli ameahidi kutoa Shilingi Milioni Mia mbili kwa ajili ya kununua vifaa mbalimbali ikiwa ni pamoja na Camera ambazo zitasaidia kurahisisha utendaji kazi katika vituo mbalimbali vya televisheni vilivyo chini ya kampuni hiyo ya African Media Group, kampuni inayomilikiwa na CCM.