Kitaifa

Waziri Mussa Zungu awasili ofisini na kutoa maagizo kwa watumishi

January 29, 2020

402

Waziri wa Nchi Ofisi ya Makamu wa Rais (Muungano na Mazingira), Mussa Azzan Zungu amemtaka kila mtumishi katika ofisi ya makamu wa rais atimize wajibu wake katika kuleta maendeleo ya Taifa letu.

Waziri wa Nchi Ofisi ya Makamu wa Rais (Muungano na Mazingira), Mussa Azzan Zungu akikaribishwa rasmi katika Ofisi ya Makamu wa Rais Jijini Dodoma. Wengine katika picha ni Katibu Mkuu Ofisi ya Makamu wa Rais Mhandisi Joseph Malongo na Balozi Joseph Sokoine Naibu Katibu Mkuu.

Ameyasema hayo leo mara baada ya kuwasili rasmi katika ofisi hiyo katika Mji wa Serikali, Mtumba jijini Dodoma na kupokewa na menejimenti na watumishi na ofisi hiyo.

Akizungumza na watumishi wa ofisi yake Waziri Zungu amewataka wote kufanya kazi kwa ushirikiano na kuahidi kuendelea kusimamia sheria, taratibu na kanuni zilizopo, huku akitoa rai kwa watanzania kuwa chachu ya mabadiliko katika kuhifadhi na kusimamia Mazingira.

“Simamieni sheria bila kumuonea mtu, pale ambapo sheria imekataza jambo simamieni sheria na kuchukua hatua kwa wote wanaokiuka,” amesisitiza.

Awali aliyekuwa Waziri wa Nchi Ofisi ya Makamu wa Rais (Muungano na Mazingira) ambae sasa ni wa Waziri wa Mambo ya Ndani ya Nchi, George Simbachawene amekabidhi ofisi rasmi kwa Waziri Zungu na kumtakia kila la heri katika kutekeleza majukumu yake mapya.

Aliyekuwa Waziri wa Nchi Ofisi ya Makamu wa Rais ambae sasa ni Waziri wa Mambo ya Ndani ya Nchi, George Simbachawene (kulia) akimkabidhi rasmi Ofisi Waziri wa Nchi Ofisi ya Makamu wa Rais (Muungano na Mazingira), Mussa Azzan Zungu (kushoto). Makabidhiano hayo yamefanyika hii leo katika Mji wa Serikali Mtumba – Dodoma.

“Tumefanikiwa katika katazo la mifuko ya plastiki, tumeridhia mikataba na itifaki mbalimbali na pia tuna programu maalumu ya upandaji mti nchi nzima ambayo ni endelevu,” Simbachawene akimueleza Zungu.

Mbali na mafanikio hayo Waziri Simbachawene amesema elimu inapaswa kutolewa kwa wananchi kuhusu tofauti ya vifungushio na vibebeo ambavyo bado wananchi wanachanganya.

Waziri wa Nchi Ofisi ya Makamu wa Rais (Muungano na Mazingira) akiwa na Waziri wa Mambo ya Ndani ya Nchi, George Simbachawene mara baada ya kukabidhiana Ofisi hii leo Mtumba Dodoma. Wengine katika picha ni Katibu Mkuu Ofisi ya Makamu wa Rais Mhandisi Joseph Malongo, Naibu Katibu Mkuu Balozi Joseph Sokoine na Mkurugenzi Mkuu wa Baraza la Taifa la Hifadhi na Usimamizi wa Mazingira nchini (NEMC) Dkt. Samwel Mafwenga.

Waziri Zungu ameteuliwa hivi karibuni na Rais Dkt. John Magufuli kushika nafasi hiyo baada ya kufanya mabadiliko madogo katika baraza la mawaziri ambapo Simbachawene aliteuliwa kuwa Waziri wa Mambo ya Ndani ya Nchi.